सुर्यदर्शनबाट सुरु भएको रविको बयान सनोपाइला पुगेर सकियो, अब कसरी बन्छ अनुसन्धान प्रतिवेदन ?

२६ मंसिर, काठमाडौं । पूर्वगृहमन्त्री एवं रास्वपा सभापति रवि लामिछानेलाई पर्सामा बयान गराएर पोखरा पुर्याइएको छ । उनलाई बाराको सिमराबाट काठमाडौं हुँदै हवाइमार्गबाट पोखरा पुर्याएको छ । अब प्रहरीले उनीविरुद्धको मुद्दा कसरी अगाडि बढाउँछ र कस्तो प्रतिवेदन बनाउनेछ भन्नेतिर सबैको चासो छ । सहकारीको बचत अपचलनको आरोपमा पक्राउ परेका लामिछाने कात्तिक ३ गते यता जिल्ला प्रहरी कास्कीको हिरासतमा छन् । 

बुटवलको सुप्रिम, पोखराको सुर्यदर्शन, काठमाडौंको स्वर्णलक्ष्मी, चितवनको साहारा र पर्साको सानोपाइला सहकारी ठगीमा उनी जोडिएका छन् । प्रहरीले सहकारी ऐन, संगठित अपराध निवारण ऐन र सम्पत्ति शुद्धीकरण निवारण ऐन प्रतिकूल कार्य गरेको भन्दै अनुसन्धान गरिरहेको छ । रवि लामिछाने दोषी वा निर्दोष भन्ने एउटा प्रसंग हो भने उनीविरुद्ध कुन हिसावले मुद्दा चलाउने भन्ने कुरा पनि उठेको छ । 

पनि मुद्दा चलाउँदा प्रारम्भिक चरणमै तीनवटा मूल आधार– हकदैया, क्षेत्राधिकार र हदम्यादको मूल्यांकन गरी मात्र मुद्दा चल्ने कि नचल्ने निर्णय गरिन्छ । यस सम्बन्धमा सहकारी ऐनअन्तर्गत कसुरमा ९० दिनभित्र अदालतमा पूरक अभियोग पेश गरी सक्नुपर्ने हदम्याद छ । रवि जोडिएका सहकारीसँग सम्बन्धित रहेर प्रहरीले उनीसँग बयान सकेको छ । अब उनीविरुद्ध मुद्दा बनाएर अदालतमा पेश गर्ने तयारीमा प्रहरी छ । सहकारी ठगीको मुख्य आरोप पुष्टि गर्न प्रहरलिाई अब समस्या छैन् । 

संसदीय छानबिन विशेष समितिले सहकारीबाट गोर्खा मिडिया नेटवर्क प्रालिमा आएको रकमको हकमा लामिछाने पनि जिम्मेवार रहने ठहर्याइ सकेको छ । विशेष प्रतिवेदनको सुझाव र सिफारिस खण्डअन्तर्गत सहकारी संस्थामा रहेको बचतकर्ताको रकम अनियमित तवरबाट गोरखा मिडिया नेटवर्क प्रालिको खातामा आइसकेपछि उक्त रकम खर्च गर्ने, गराउने प्रक्रियामा संलग्न रहेको देखिन आएबाट निज सञ्चालकहरु गीतेन्द्रबाबु राई र सदस्य कुमार रम्तेल तथा तत्कालीन प्रबन्ध निर्देशक रवि लामिछाने र सञ्चालक छविलाल जोशी कम्पनीमा साझेदारका रूपमा बहाल रहेको भनिएको छ । 

सो अवधिमा सहकारीबाट कम्पनीमा आएको रकमको हकमा जिम्मेवार रहेको हुँदा प्रचलित कानून बमोजिम कारबाहीका लागि नेपाल सरकारलाई सिफारिस गर्ने’ भनिएको छ । विशेष समितिको सिफारिस र माघ २२, २०८० मा जिल्ला प्रहरी कार्यालय, कास्कीमा परेको पूरक जाहेरीका आधारमा नियन्त्रणमा लिएर प्रहरीले लामिछानेविरुद्ध अनुसन्धान सुरु गरेको थियो । अहिले पाँच वटा सहकारी पुगिसकेका छन् । वीरगञ्जको सानो पाइला बचत तथा ऋण सहकारी संस्थामा बचकर्ताको रकम हिनामिना गरेको प्रकरणमा बयान सकेर रविलाई बुधबार पोरा पुर्याइएको छ ।  

उनलाई बुद्ध एयरको विमानस्थलबाट काठमाडौं हुँदै पोखरा लगिएको हो । लामिछाने जोडिएको सहकारी ठगी प्रकरणको अनुसन्धान प्रहरीले अन्तिम चरणमा पुगेको प्रहरीले जनाएको छ । केन्द्रीय अनुसन्धान ब्यूरो (सीआईबी) का प्रमुख दिपक थापाका अनुसार, सबैतिर बयान सकिएसँगै प्रहरीले लामिछाने जोडिएको संगठित अपराध, सहकारी ठगी र सम्पत्ति शुद्धीकरणको अनुसन्धान लगभग अन्तिम चरणतिर पुर्याएको छ । अब प्रतिवेदन बन्छ । 

पोखराको सूर्यदर्शन सहकारीबाट सुरु भएको लामिछानेमाथिको अनुसन्धानपछि अरु चार सहकारी अनियमितताको छानबिनसम्म पुगेको थियो । सूर्यदर्शनसँगै रुपन्देहीको सुप्रिम सहकारी, काठमाडौंको स्वर्णलक्ष्मी सहकारी, चितवनको सहारा चितवन र वीरगञ्जको सानो पाइला सहकारीमा बचतकर्ताको रकम अनियमिततामा प्रहरीले लामिछानेसँग बयान लिएको छ ।

थापा समितिको प्रतिवेदन कार्यान्वयन गर्ने क्रममा प्रहरीले पूर्वडीआईजी छविलाल जोशीलाई ६ असोजमा पक्राउ गरेको थियो भने लामिछानेलाई २ कात्तिकमा बनस्थलीस्थित पार्टी कार्यालयबाटै नियन्त्रणमा लिएको थियो । सानोपाइला सहकारीको बचत रकम अपचलनमा बयानका लागि लामिछानेलाई सोमबार पर्सा पुर्याइएको थियो । मंगलबार बयान सकेर बुधबार बिहान सिमरास्थित विमानस्थलबाट काठमाडौं हुँदै पोखरा पुर्याइएको हो । 

लामिछानेसहित प्रतिवादीहरूलाई म्याद थपका लागि बिहीबार अदालतमा उपस्थित गराउनुपर्नेछ । सानोपाइला सहकारीबाट गोर्खा मिडिया नेटवर्क र नेचर्स हर्ब्समा रकम गएको देखिएपछि प्रहरीले उनीहरूविरूद्ध पुर्जी लिएको हो । सानोपाइला बचत तथा ऋण सहकारी संस्था लिमिटेडमा एक अर्ब ४५ करोड बढी रकम बचत थियो । त्यसमध्ये उक्त सहकारीबाट गोर्खा मिडिया नेटवर्कमा ८ करोडभन्दा बढी रकम प्रवाह भएको देखिएको सहकारी अपचलन सम्बन्धी संसदीय विशेष समितिको प्रतिवेदनमा उल्लेख छ ।