स्वास्थ्य मन्त्रालयले भन्यो, निजी अस्पतालले नर्स र स्वास्थ्यकर्मीलाई सरकारी सरह पारिश्रमिक दिनू

२८ मंसिर, काठमाडौं । स्वास्थ्य तथा जनसंख्या मन्त्रालयले देशका सबै निजी अस्पताल तथा स्वास्थ्य संस्थामा कार्यरत सबै कर्मचारीलाई सरकारी अस्पतालले दिएको सेवासुविधान सरह गर्न सर्कुलर गरेको छ । अब निजी स्वास्थ्य संस्थाहरूले आफ्नो संस्थामा कार्यरत सबै नर्सिङ एवं स्वास्थ्यकर्मीहरूलाई सरकारी सरह पारिश्रमिक दिनुपर्नेछ । 

न्युनतम पारिश्रमिक सरकारी सरह लागू नभएको पाइए कारवाही गर्ने मन्त्रालयको चेतावनी छ । स्वास्थ्यमन्त्री प्रदीप पौडेलको सचिवालयले दिएको जानकारी अनुसार यो मन्त्रालयको सचिवस्तरीय निर्णय अनुसार गरिएको हो । अब देशभरका प्रतिष्ठान सरकारी अस्पताल, मेडिकल कलेज र सामुदायिक निजी अस्पतालले सरकारी सरह सेवा र सुविधा दिनुपर्ने छ । स्वास्थ्यकर्मीलाई अनुभवको पत्र प्रदान गर्नुपर्ने पनि जनाइएको छ । नर्सिङ लगायतका अन्य स्वास्थ्यकर्मीहरूको पारिश्रमिक बैकिङ प्रणालीबाट मात्र उपलब्ध गराउन पनि पत्रमा भनिएको छ ।

सबै यस्ता संस्थालाई पत्र लेख्दै स्वास्थ्यकर्मीको सेवा सुविधा व्यवस्था गर्न भनिएको छ । तोकिएको समय भन्दाबढी कार्यको लागि अतिरिक्त भत्ताको व्यवस्था गर्नुपर्ने मन्त्रालयको निर्णयमा भनिएको छ । स्वास्थ्य तथा शैक्षिक संस्थाले करार नियुक्ति सम्झौता गरी राख्नुपर्ने, ज्यालादारीमा कार्य गराउन नपाईने, सक्कल शैक्षिक लब्धांक पत्रहरू कार्यालयले राख्न नपाइने पनि निर्णयमा भनिएको छ ।