ऐतिहासिक र सांस्कृतिक धरोहर, जानकी मन्दिर ( फोटो फिचर )

२९ मंसिर, काठमाडौं । धार्मिक हिसाबले नेपाल र भारत दुबै देशका हिन्दू धर्मावलम्बीको सम्बन्ध सेतु हो । जनकपुर उपमहानगरपालिकामा रहेको चर्चित जानकी मन्दिर । जनकपुर सीताको जन्मस्थल हो, जहाँ भारतबाट वर्षेनी विवाह पञ्चमीको अवसर पारेर जन्तीका रुपमा तीर्थयात्रीहरु आउने गर्छन् । 

ऐतिहासिकरुपले महत्वपूर्ण सांस्कृतिक धरोहर मानिन्छ जानकी मन्दिर । यो मन्दिरमा पुग्ने जोकोहीलाई यहाँको कलात्मक बनावटले मन्त्रमुग्ध बनाउँछ । मुगल शैलीमा बनेको यस प्रख्यात मन्दिरलाई कलाको उत्कृष्ट नमूनाका रुपले हेर्ने गरिन्छ । 

प्राचीन मिथिला राज्यको राजधानी जनकपुरमा अवस्थित यो मन्दिर विश्वभर रहेका हिन्दुहरुको आस्थाको केन्द्रका रुपले प्रख्यात छ । मन्दिर निमार्णका लागि भारतको मध्यप्रदेश टिकमगढकी राजकुमारी बृषभानु कुमारीले ९ लाख चाँदीका असर्फी खर्च गरेर निर्माण भएकाले यस मन्दिरलाई नौलाख मन्दिर पनि भन्ने गरिन्छ । 

मन्दिर निर्माण प्रक्रिया सन् १८९४ मा सुरु भई १९११ मा सकिएको थियो । मन्दिर निर्माण भएको १२१ वर्षजति भएतापनि मन्दिरमा रहेका मूर्तिहरू ७ सय वर्ष पुराना छन् । जानकी मन्दिरमा चैतको रामनवमी, वैशाखमा जानकी नवमी, मंसिरमा रामजानकी विवाह महोत्सव, असोजमा पूर्णिमा कोजाग्रत र साउन भदौमा झुला मेला लाग्ने गर्छ । 

सो मन्दिर संघीय राजधानी काठमाडौंबाट सार्वजनिक बसमा ७-८ घण्टा लाग्छ । रामजानकी मन्दिर परिसरमा राममन्दिर, जानकी मन्दिर, विवाह मण्डप, धनुष सागर र गंगासागर पोखरीहरू छन् । तस्बिर : नेपाल फोटो लाइब्रेरी ।