पुस महिनाका लागि १४ वाणिज्य बैंकले यथावत राखे ब्याजदरः तीन वटाले बढाए, तीनले घटाए

३० मंसिर, काठमाडौं । पुस महिनाका लागि १४ वटा वाणिज्य बैंकहरुले मंसिरकै ब्याजदरलाई निरन्तरता दिएका छन् । पुसका लागि नयाँ ब्याजदर सार्वजनिक गर्दै तीन बैंकले घटाएका छन भने तीन बैंकले बढाएका छन् । बाणिज्य बैंकहरुले पुस १ गतेदेखि लागू हुनेगरि नयाँ ब्याजदर सार्वजनिक गरेका हुन् । 

हाल सञ्चालनमा २० वाणिज्य बैंकहरु रहेका छन् जसमध्ये तीन वटा वाणिज्य बैंकले ब्याजदर बढाएका छन् भने ३ वटाले घटाएका छन् । १४ वाणिज्य बैंकले मंसिरकै ब्याजदरलाई निरन्तरता दिएका छन् । ब्याजदर बढाउने बैंकहरुमा कृषि विकास बैंक, एनएमबि बैंक र प्राइम कमर्सियल बैंक रहेका छन् । नेपाल बैंक, सानिमा बैंक र एनआईसी एशिया बैंकले ब्याजदर घटाएका छन् । 

तीन बैंकले मंसिर महिनाको तुलनामा पु्सका लागि ब्याजदर ०.०५ प्रतिशत बिन्दुले ब्याजदर बढाएका छन् । मंसिरमा २० वटा वाणिज्य बैंकको ब्याजदर औषतमा ५.९७ प्रतिशत थियो  । एनएमबिले ब्याजदर १.०३ प्रतिशत बिन्दुले बढाएर ६.६ प्रतिशत पुर्याएको छ । प्राइम बैंकले ०.५ प्रतिशत बिन्दुले बढाएर ६.२५ पुर्याएको छ । यस्तै कृषि विकास बैंकले पनि ब्याजदर ०.०४ प्रतिशत बिन्दुले बढाएर ५.५७ प्रतिशत पुर्याएको छ ।

मंसिरको तुलनामा पुसमा एनआईसीले ०.१९ प्रतिशतले घटाएर ६.६ प्रतिशत कायम गरेको छ । सानिमा बैंकले ब्याजदर ०.१ प्रतिशत बिन्दुले घटाएर ६.०५ प्रतिशत रहेको छ भने नेपाल बैंकको ब्याजदर ०.३५ प्रतिशत बिन्दुले घटाएर ५.६ प्रतिशत रहेको छ । बाँकी बैंकको ब्याजदर भने यतावत छ ।

 डाटाः बैंकर्स संघ