एमाले देश बनाउन आएको पार्टी हो, राजनीतिको मात्र कुरा नगर्नुः ओली

३० मंसिर, काठमाडौं । नेकपा एमालेको अध्यक्ष एवं प्रधानमन्त्री केपी शर्मा ओलीले नेकपा एमाले देश बनाउनका बनेको पार्टी भएकोले यसमा बसेर राजनीतिको मात्र कुरा नगर्न आग्रह गरेका छन् । उनले पार्टीका नेता कार्यकर्तालाई यसमा बसेर राजनीतिको मात्र कुरा नगर्न भनेका हुन् । 

आइतवार पार्टी केन्द्रीय कार्यालय च्यासलमा आयोजित राष्ट्रिय कार्यशालालाई सम्बोधन गर्दै प्रधानमन्त्री ओलीले यो राजनीति गर्न बनेको पार्टी होइन, देश बनाउन बनेको पार्टी हो भने । उनले एमाले जन्मैदेखि एउटा महान उद्देश्य काँधमा बोकेर जन्मिएको उल्लेख गरे । 

देशमा सकारात्मक परिवर्तन ल्याउन र नागरिकलाई अधिकार सम्पन्न बनाउने गरी एमालेले काम गरिरहेको उनले बताए । त्यसैले जनताले परिवर्तनको अनुभूति पाउने गरी काम गर्न प्रधानमन्त्री ओलीले नेता–कार्यकर्ताहरुलाई निर्देशन दिए ।

‘परिस्थितिमा परिवर्तन ल्याउने गरी नै यहाँबाट फर्किएर गएर यसलाई व्यवहारिक, मूर्त रुप दिने काम गर्नु हुनेछ, मैले विश्वास लिएको छु,’ प्रधानमन्त्री ओलीले भने । प्रधानमन्त्री ओलीले जनताले सजिलोसँग खान, लाउन र बाँच्न पाउनुपर्ने उनले बताए ।