छानबिन समितिको निर्णय कार्यन्वयन गरेको हो, रवि वा छबीप्रति प्रतिशोध लिनुपर्ने कारण छैनः गृहमन्त्री

३० मंसिर, काठमाडौं । गृहमन्त्री रमेश लेखकले कसैप्रति प्रतिशोध लिन नभई सरकारले सहकारी ठगी प्रकरणमा संसदको छानविन समितिले दिएको प्रतिवेदन कार्यन्वयनमा गरिरहेको दाबी गरेका छन् । उनले रवि वा छबी कसैसँग पनि प्रतिशोध लिनुपर्ने कारण नरहेको बताएका छन् । 

नेपाल प्रेस युनियन चितवनले आइतबार आयोजना गरेको पत्रकार सम्मेलनमा बोल्दै उनले सरकारले संसदीय छानबिन समितिले गरेको निर्णय कार्यान्वयन गरेको बताए । उनले राष्ट्रिय स्वतन्त्र पार्टीका सभापति रवि लामिछानेको अनुसन्धानको क्रममा सरकारले प्रतिशोधको भावना नराखेको बताए । छानबिन समितिको निर्णय कार्यान्वयन गर्नु सरकारको कर्तत्य हो, यसमा दोषी देखिएका जोकोही पनि कारवाहीमा  पर्छन, यो वा त्यो भन्ने हुँदैन, उनले भने । 

२ कात्तिकमा सहकारीको रकम अपचलनको आरोपमा प्रहरीले लामिछानेलाई पक्राउ गरेको थियो । लामिछानेमाथि सत्ताले राजनीतिक प्रतिशोध साँधेको रास्वपाले आरोप लगाउँदै आएको छ । उनले यसको खण्डन गर्दै सरकारले छानबिन समितिको निर्णय हेर्ने यो वा भनेर व्यक्ति नहेर्ने बताए । रविप्रति कानुनी रूपमा अनुसन्धान सुरु गरिएको उनले बताए । 

कानुनअनुसार भइरहेको अनुसन्धानमा प्रश्न उठाएर अनुसन्धान प्रभावित पार्न नहुने उनको भनाइ छ । सहकारीको रकम अपचलन गर्ने सबैमाथि अनुसन्धान हुने र व्यक्ति विशेषलाई अनुसन्धान गर्ने र कसैलाई छुट दिने कुरा नहुने बताए । अपराध गर्ने मानिस सबैमाथि अनुसन्धान हुने उनको भनाइ थियो । 
 
गृहमनत्री लेखकले सबै दलहरूको सहमतिमा संविधान संशोधन हुने बताए । संविधान संशोधन संघीय लोकतान्त्रिक शासन व्यवस्था र समावेशितालाई बलियो बनाउनका लागि गर्न लागिएको उनले दाबी गरे । संविधान संशोधनको विषयमा प्रारम्भिक छलफल सुरु भएको छ । संशोधन दुईवटा दलले मात्रै गर्ने होइन, उनले भने ।  

संविधानको अभ्यासको विषयमा समीक्षा, संविधानको अभ्यास  गर्ने क्रममा देखिएका सबल पक्ष र दुर्बल पक्षलाई हेरेर सबै राजनीतिक पक्षसँग वार्ता छलफल गरेर सबैको सहमतिका साथ संविधान संशोधन गर्ने उनले बताए । संविधान संशोधनका लागि कसै न कसैले त पहल गर्नु पर्याे । प्रारम्भिक छलफल भएको छ । सबै दललाई समेटेर संविधान संशोधन गर्छौं, उनले भने । 

सरकारको स्थायित्व नै कमजोर भएको अवस्थामा स्थिर सरकार गठन, भ्रष्टाचार नियन्त्रण, सुशासन, आर्थिक गतिविधिलाई अघि बढाउने, मुलुकको अर्थतन्त्र लयमा ल्याउन, विकास निर्माणलाई गति दिन नेपाली कांग्रेस र नेकपा (एमाले) मिलेर सरकार बनेको मन्त्री लेखकले बताए ।  यो सरकार परिवर्तन हुने कुनै सम्भावना नभएको दाबी गर्दै उनले भने कांग्रेस र एमालेबीचमा सहमति भएको छ, ०८४ सालसम्म त्यही सहमतिअनुसार हामी अघि बढ्छौँ ।