कास्की प्रहरीले सरकारी वकिललाई बुझायो सहकारी ठगीमा रविको सम्लग्नताबारे अनुसन्धान प्रतिवेदन

१ पुस, काठमाडौं । कास्की प्रहरीले सहकारी ठगीमा राष्ट्रिय स्वतन्त्र पार्टी (रास्वपा)का सभापति एवं पूर्व गृहमन्त्री रवि लामिछाने विरुद्धको अनुसन्धान प्रतिवेदन बुझाएको छ । जिल्ला सरकारी वकिल कार्यालयमा प्रतिवेदन बुझाइएको जिल्ला प्रहरी कार्यालय कास्कीका डीएसपी बसन्त शर्माले नेपालबहसलाई जानकारी दिएका छन् । लामिछानेविरुद्ध अनुसन्धान सकेर रायसहितको प्रतिवेदन सरकारी वकिललाई बुझाएको उनले बताए । 

प्रहरीले अनुसन्धान सकेर सोमबार जिल्ला सरकारी वकिलको कार्यालयमा प्रतिवेदन बुझाएको हो । प्रहरीका पूर्वडीआईजी छविलाल जोशी लगायतका अनुसन्धानमा रहेका अन्य व्यक्तिलाई प्रतिवादी बनाइएको छ । प्रहरीले लामिछानेविरुद्ध सहकारी ठगी, संगठित अपराध र सम्पत्ति शुद्धिकरणको कसुरमा प्रतिवेदन बुझाएको छ । लामिछानेले कास्कीको सूर्यदर्शन सहकारीसहित विभिन्न ५ भन्दा बढी सहकारीको रकम गोर्खा मिडिया नेटवर्कमा लगेर जथाभावी खर्च गरेको देखिएको प्रतिवेनमा उल्लेख छ । 

पोखराको सूर्यदर्शन सहकारीबाट सुरु भएको लामिछानेमाथिको अनुसन्धानपछि अरु चार सहकारी अनियमितताको छानबिनसम्म पुगेको थियो । सूर्यदर्शनसँगै काठमाडौंको स्वर्णलक्ष्मी सहकारी, चितवनको सहारा चितवन र वीरगञ्जको सानो पाइला सहकारीमा बचतकर्ताको रकम अनियमिततामा प्रहरीले लामिछानेसँग बयान लिएको छ । लामिछानेलाई २ कात्तिकमा बनस्थलीस्थित पार्टी कार्यालयबाटै नियन्त्रणमा लिएको थियो ।