धनुषामा तस्करीः सशस्त्रका एसपी गिरी छानविनका लागि मुख्यालय बोलाइए, प्रहरीका एसपी तिवारी कहिले ?

१ पुस, काठमाडौं । तस्करलाई लाइन दिएर संगठित तस्करी गराएको आरोपमा धनुषाको सशस्त्र प्रहरी गण नम्बर ८ गणका एसपी दर्शन गिरीलाई सशस्त्र प्रहरी मुख्यालयले आवश्यक छानविनका लागि तानेकाे छ । उनीमाथि गत शुक्रबार स्वयम्भू स्थित हेडक्वार्टरमा तानेर सोधपुछ गरिरहेको आज तीन दिन पुगेको छ । तर नेपाल प्रहरीका जिल्ला प्रहरी प्रमुख एसपी भुवनेश्वर तिवारीलाई भने प्रहरी प्रधान कार्यालयले यो समाचार तयार पार्दासम्म तानेको छैन ।

सशस्त्र प्रहरी बलको कानुन शाखाले २४ घण्टे लगाउँदै सशस्त्र एसपी गिरीलाई बोलाएर शुक्रबारदेखि सोधपुछ गरेको हो । ‘उहाँलाई मुख्यालयले केही कुरा बुझ्नु पर्ने भनेर कानुन शाखामार्फत गत शुक्रबार बोलाइएको छ, उहाँमाथि परेका उजुरी उपर छानवीन हुँदैछ’, सशस्त्र प्रहरी बलका प्रवक्ता डीआईजी कुमार न्यौपानेले नेपालबहसलाई भने ।

धनुषाको इनर्वा, जटही, दुहबी, खजुरी, फूलगामा, इटहर्वा, मैनाथपुर लगायतका सीमावर्ती नाकाबाट नेपाल प्रहरी र सशस्त्र प्रहरीको संलग्नतामा संगठित तस्करी गराएको आरोपमा एसपी गिरीमाथि छानवीन शुरु भएको हो । तराईका सीमावर्ती नाकाबाट ठूलो मात्रामा संगठित तस्करी गराउन नेपाल प्रहरी तथा सशस्त्र प्रहरी दुवैको साथ सहयोग चाहिने गर्छ । धनुषाका यी नाकाबाट बिगत लामो समयदेखि दुवै सुरक्षा संयन्त्रको सहयोगमा स–साना झोलेपोके तस्करीमा कडाइ गरेको देखाएर ठूलो स्केलमा व्यापक तस्करी मौलाएको छ ।

सशस्त्र एसपी गिरी र नेपाल प्रहरीका एसपी तिवारीले धनुषाका सीमा क्षेत्रबाट संगठित तस्करी गराएको दर्जनौं उजुरी सशस्त्र मुख्यालय र प्रहरी प्रधान कार्यालय नक्सालमा परेका थिए ।  उनीहरुको मिलेमतोमा बदमासी भएको थाहा पाएपछि मधेश प्रदेशका लागि सशस्त्र प्रहरी महानिरीक्षक (आईजीपी) राजु अर्यालले एक विशेष टोली परिचालन गरेका थिए । सोही टोलीले दिएको रिपोर्टको आधारमा उनलाई मुख्यालयले सोधपुछका लागि बोलाएको हो । तर नेपाल प्रहरीतर्फ भने आईजीपीको प्रत्यक्ष मातहत रहेको उजुरी छानविन टोलीले के गरिरहेको छ भन्ने जानकारी दिएको छैन । एसपी र डीआईजीले खटाएका सानातिना घुमुवा सिपाही हबल्दारलाई कहिलेकाँही तानेर हल्ला गराउनु बाहेक अर्को गतिलो काम नेपाल प्रहरीको नेतृत्वबाट हुन सकेको छैन ।

मधेश प्रदेशको राजधानीका रुपमा रहेको धनुषाबाट यतिबेला ठूला तस्करहरूले समूह समूह बनाएर तस्करीको रुट नै चलाएको खबर छ । प्रत्येक तस्कर समूहले नेपाल प्रहरी र सशस्त्र प्रहरीका एसपीलाई महिनावारी ३–५ लाख अलग–अलग बुझाएर संगठित तस्करी धन्दा निर्वाध रुपमा चलाएको बताइएको छ ।

धनुषाको जटही नाकाबाट सुल्तान मियाँ, बीरु र गब्बरको एउटा तस्कर समूह तथा नरेशको अर्को समूहले तस्करी धन्दा चलाएका छन् । सुल्तानको समूहले नेपालबाट चाइनिज लसुनको ठूलो मात्रामा अवैध निकासी गरिरहेका छन् भने नेपालका बहुराष्ट्रिय कम्पनीद्वारा उत्पादित कोलगेट टुथपेष्ट, स्याउ, मटर–केराउ र रक्सी भारततर्फ निर्यात गरिरहेको बताइएको छ । उताबाट कपडा, हार्डवेयर लगायतको अवैध आयात भइरहेको छ । त्यस्तै नरेशले भारतीय कपडा, चप्पल लगायतको तस्करी गर्ने गरेका छन् । केही दिन अघि मधेश प्रदेश डीआईजीको आदेशमा नरेशको गोदाममा प्रहरीले छापा मारी १ गाडी कपडा र चप्पल बरामद गरेको थियो ।

यस्तै नामुद तस्कर उमेश साहले फुलगामा नाकाबाट भारततर्फ चाइनिज लसुन, स्याउ, मटर, केराउ, मरिच र रक्सीको चोरी पैठारी गर्ने तथा उताबाट कपडा, किराना तथा हार्डवेयर लगायतका सामानको अवैध आयात गर्ने गरेका छन् । खजुरीबाट छोटु र एहसान नामक तस्करले भारततर्फ नेपाली आइटम रक्सी, टुथपेष्ट, लाइटर, मटर केराउ, लसुन र पोस्तादान पठाइरहेका छन् भने भारतबाट कपडा, किराना आइटम लगायतको चोरी निकासी भइरहेको छ ।

अर्का नामुद तस्कर शंकर साहले भारतीय प्याजको ठूलो मात्रामा चोरी पैठारी गरिरहेका छन् । भन्सारसँगको सेटिङ समेत मिलाएर शंकरले महोत्तरीको मटिहानी नाकाबाट पिकअपमा जनकपुर गोदाममा अनलोड गर्ने र ट्रकका ट्रक प्याज काठमाडौं पठाउने गरेका छन् । यसैगरी राजीव महासेठले दुहबी नाकाबाट नेपाली आइटम रक्सी, लसुन भारत पठाउने तथा उताबाट किराना आइटम नेपाल भित्र्याउने गरेका छन् । यस्तै इनर्वा नाकाबाट बहिरा उपनामका तस्करले हरेक दिन १०/१२ पिकअप नेपाली रक्सी भारत पठाउने गरेका छन् । इटहर्वा नाकाबाट अयुब मुसलमानले गाई गोरुको अवैध निकासी भारततर्फ गरिरहेका छन् ।

जनकपुर क्षेत्रमा यी लगायत अन्य दर्जनौं ठूला तस्करहरू पनि सक्रिय छन् । अधिकांशले ३ देखि ५ लाखका दरले छुट्टाछुट्टै नेपाल प्रहरी र सशस्त्र प्रहरी प्रमुखलाई दररेट बुझाएर तस्करी लाइन खुलाउने गरेको दावी समाचार सेतको छ । अहिले दैनिक ८ बजे साँझ देखि बिहान ३ बजेसम्ममा यी सीमावर्ती नाकाहरूबाट तस्करी भइरहेको स्थानीयहरू बताउँछन् । ठूलो मात्रामा भइरहेको यो तस्करीले सरकारको राजश्व संकलनमा दैनिक करोडौं नोक्सानी गराइरहेको छ ।

यसै बीच सशस्त्र प्रहरीभित्र आफूलाई माओवादी अध्यक्ष पुष्पकमल दाहालको धर्मपुत्रको रुपमा प्रस्तुत गर्दै हिँड्ने गिरीलाई अर्यालले तानेर छानवीन गर्न थालेपछि उनी विभिन्न शक्तिकेन्द्र धाउन थालेका छन् । उनी प्रचण्डपुत्री रेणु दाहाल र गंगालाई दिदी नाता लगाएर सशस्त्र प्रहरी मुख्यालयमा आएर फूर्ति लगाउँदै धनुषा सरुवा गराउन सफल भएका थिए । अघिल्लो पटक शैलेन्द्र खनाल आईजीपी हुँदा उनले सामाजिक सञ्जालमा स्टाटस लेखेर नेतृत्वलाई ठीक लगाउने धम्की दिएका थिए । यसपटक भने राजु अर्यालको फेला परेका छन् । नेपाल प्रहरी र सशस्त्र प्रहरीकै सेटिङमा धनुषामा तस्करी बढेको छ । 

एसपी गिरी यसअघि सशस्त्रको रसुवास्थित गुल्मको डीएसपी हुँदा पनि उनी सुनदेखि रक्तचन्दन तस्करीमा मुछिएका पात्र हुन् ।