५ महिनामा सरकारले विकासमा ४० अर्ब ८० करोड र तलव भत्तामा ३ खर्ब ६३ अर्ब गर्यो खर्च

१ पुष, काठमाडौं । चालु आर्थिक वर्ष पाँच महिनामा सरकारले आम्दानी र खर्चमा सुधार गर्न सकेको छैन् । खर्चभन्दा आम्दानी कमजोर देखिएको छ । मंसिर मसान्तसम्म सरकारले ४ खर्ब पाँच अर्ब ७७ करोड ३० लाख रुपैयाँ राजश्व संकलन गरेको छ । यो वार्षिक लक्ष्यको २८ प्रतिशत हो । बजेट खर्च करिब ३० प्रतिशत भएको छ । ५२ अर्ब ३२ करोड ६५ लाख वैदेशिक अनुदान लिने भनिए पनि हालसम्म कुनै अनुदान लिएको देखिँदैन ।

महालेखा नियन्त्रकको कार्यालयले जनाएअनुसार सरकारको विकास खर्च झनै कमजोर देखिएको छ । चालु आर्थिक वर्षका लागि पुँजीगत शीर्षकमा ३ खर्ब ५२ अर्ब ३५ करोड ४० लाख विनियोजन गरेकोमा हालसम्म ११ दशमलव ५८ प्रतिशत अर्थात् ४० अर्ब ८० करोड ६ लाख रुपैयाँ खर्च भएको छ । चालु शीर्षकमा मंसिर मसान्तसम्मको खर्च ३१ दशमलव ८७ प्रतिशत छ । 

यो वर्ष चालु शीर्षकमा ११ खर्ब ४० अर्ब ६६ करोड ४५ लाख रुपैयाँ विनियोजन भएको थियो । जसमा हालसम्म ३ खर्ब ६३ अर्ब ५५ करोड १४ लाख बराबर खर्च भएको छ । वित्तीय व्यवस्था शीर्षकमा छुट्याइएको बजेट वार्षिक लक्ष्यको ४१ दशमलव ३२ प्रतिशत खर्च भएको छ । मुख्यगरी सार्वजनिक ऋणको साँवा र ब्याज तीर्न खर्च हुने वित्तीय व्यवस्था शीर्षकमा चालु आर्थिक वर्षका लागि ३ खर्ब ६७ अर्ब २८ करोड ४५ लाख विनियोजन भएको थियो । 

उक्त शीर्षकमा हालसम्म एक खर्ब ५१ अर्ब ७६ करोड ५७ लाख बराबर खर्च भएको हो । मंसिर मसान्तसम्ममा वार्षिक लक्ष्यको २७ दशमलव ५७ प्रतिशत अर्थात् ४ खर्ब पाँच अर्ब ७७ करोड ३० लाख राजश्व संकलन भएको छ । चालु आर्थिक वर्षका लागि सरकारले १४ खर्ब ७१ अर्ब ६२ करोड ९५ लाख रुपैयाँ राजस्व उठाउने लक्ष्य राखेको छ ।