१८ अर्ब ६६ करोडको प्रतिबद्धता आएकोमा ५ अर्ब ७६ करोड मात्र भित्रियो एफडीआई

१ पुष, काठमाडौं । चालु आर्थिक वर्षको चार महिनामा प्रत्यक्ष विदेशी लगानी प्रतिबद्धता जनाएको भन्दा निकै कम प्राप्त भएको छ । नेपाल राष्ट्र बैंकले सार्वजनिक गरेको तथ्यांक अनुसार १८ अर्ब ६६ करोड  प्रत्यक्ष विदेशी लगानी प्रतिबद्धता भएकोमा ५ अर्ब ७६ करोड मात्रै भित्रिएको छ । 

चालु आर्थिक वर्षको चार महिनामा खुद विदेशी लगानी ५ अर्ब ७६ करोड रुपैयाँ मात्रै प्रत्यक्ष विदेशी लगानी भित्रिएको हो । साउनदेखि कात्तिकमा २ अर्ब ७४ करोड ३९ लाख रकम बाहिरिदाँ ५ अर्ब ७६ करोड रुपैयाँ मात्रै भित्रिएको छ । गत आर्थिक वर्षको चार महिनामा ३ अर्ब ६५ करोड आएको थियो ।

उद्योग विभागका अनुसार चार महिनामा १८ अर्ब ६६ करोड रुपैयाँ विदेशी लगानी प्रतिबद्धता आएको छ । विभागका अनुसार अटोमेटिक रुटमार्फत १०९ उद्योगमा १ अर्ब ६२ करोड ७३ लाख र अप्रुभल रुटमार्फत १५४ उद्योगमा १७ अर्ब ३ करोड ७७ लाख ५६ हजार लगानी प्रतिबद्धता आएको हो । सबैभन्दा बढी पर्यटनमा ६६ प्रतिशत आएको छ । 

चार महिनामा १८ अर्ब ६६ करोड रुपैयाँ विदेशी लगानी प्रतिबद्धता आउँदा ५ अर्ब ७६ करोड रुपैयाँ मात्रै भित्रिएकोले पनि प्रतिबद्धताभन्दा भित्रिने रकम न्यून रहेको तथ्यांकले देखाउँछ । राष्ट्र बैंकको तथ्यांकमा सेवा क्षेत्रमा २३ प्रतिशत, उत्पादनमा ७ प्रतिशत, कृषिमा ३ प्रतिशत र सूचना तथा प्रविधिमा १ प्रतिशत लगानी प्रतिबद्धता आएको छ ।