सुरक्षा गोष्ठीमा गृहमन्त्रीले सोधे, लुम्बिनीको तस्करी र राजस्व चुहावट किन रोकिएन ?

२ पुष, बुटवल । मंगलबार भैरहवामा आयोजित सुरक्षा गोष्ठीमा गृहमन्त्री रमेश लेखकले लुम्बिनी प्रदेशमा बढ्दो राजस्व चुहावट, तस्करी र अपराधका विषयमा चासो देखाएका छन् । उनले सुरक्षा निकायलाई तस्करी नियन्त्रण गर्न कसले रोकिरहेको छ भनेर प्रश्न गरेका छन् । लुम्बिनी प्रदेश तस्करीमा निकै अगाडि रहेको उनको भनाइ छ । 

सुरक्षा गोष्ठीलाई सम्बोधन गर्दै गृहमन्त्री लेखकले राजस्व चुहावट, तस्करी र सीमापार अपराध तुरुन्त रोक्न सुरक्षा निकायका अधिकारीहरू लाग्नुपर्ने बताए । लेखकले लुम्बिनीमा लागूऔषध, वित्तीय अपराध,  आत्महत्या, सवारी दुर्घटना, साइबर क्राइम जस्ता अपराध धेरै बढिरहेको दावी गरे । समाजमा द्वन्द्व र अराजकता निम्ताउने गरी व्यक्तिको चरित्र हत्या र दुष्प्रचार नियन्त्रण नभएको बताए । गृहमन्त्रीले कानुनी शासनमा भीडले प्रभावित गर्ने प्रयास असफल बनाउन सरकारी संयन्त्र असफल देखिएको बताए । 

गृहमन्त्री लेखकले अहिलेको  गठबन्धन सरकार मुलुकमा दिगो शान्ति र सुशासन कायम गर्न बनेको दाबी गर्दै गठबन्धन २०८४ को चुनावसम्म कायम रहने बताए । २०८४ को चुनावसम्म यही गठबन्धन रहन्छ कुनै तल–माथि हुन्न, उनले भने । अहिलेको संविधानले नागरिकलाई अधिकार सम्पन्न बनाएकाले संविधानको रक्षा महत्वपूर्ण भएको उनको भनाइ छ । संविधानको रक्षा र कार्यान्वयनका लागि शान्ति सुरक्षाको सुनिश्चित हुनुपर्ने लेखकले बताए ।

लुम्बिनी प्रदेश बुद्ध जन्मस्थलका कारण विश्वभरका धार्मिक पर्यटक आउने थलो र विश्व शान्तिको मुहान भएकाले यहाँको सुरक्षा व्यवस्था चुस्त र भरपर्दो हुनुपर्ने गृहमन्त्रीले बताए । यसअघि सात वटै प्रदेशका आन्तरिक मामिला मन्त्रीहरूसँग छलफल गरेर राय सुझाव लिएको उनले जानकारी दिए ।