प्रमुख राजनीतिक शक्तिले जिम्मेवारीबोध नगर्दा कानुन बनाउन सकिएन, संघीयतामाथि प्रश्न उठ्योः सभामुख

२ पुष, पोखरा । प्रतिनिधिसभाका सभामुख देवराज घिमिरेले प्रमुख राजनीतिक दलहरूले जिम्मेवारीबोध नगर्दा संघीयता कार्यान्वयनसँग जोडिएका कानुन बनाउन नसकिएको बताएका छन् । उनले धेरै अगाडि बनाइसक्नु पर्ने कानुन अहिलेसम्म नबन्दा संघीयता कार्यान्वयनमा प्रश्न उठ्ने गरेको बताएका छन् । पोखरामा मंगलबार देखि सुरु भएको अन्तर व्यवस्थापिका सम्मेलनमा उनले यस्तो बताएका हुन् । 

संघीयता कार्यान्वयनसँग जोडिएका कानुन निर्माण गर्न ढिला भएको बताउँदै सभामुख घिमिरेले आगामी अधिवेशनमा ती विधेयक पारित गर्न संसदले सकारात्मक भूमिका निर्वाह गर्नुपर्ने बताए । आधारभूत रुपमा संघीयताको पक्षमा भएका र संविधान निर्माणमा योगदान गरेका दलहरू नेतृत्वमा रहेकाले संविधान अनुकूल निर्माण गर्नुपर्ने कानुन बनाउन ढिला भए त्यसको असर दलमा पनि पर्ने उनको भनाइ छ ।  

घिमिरेले संसारमा संसद प्रभावकारी भएमात्रै सरकारले सेवा प्रवाहमा सुधार गर्ने गरेका उदाहरण रहेको बताए । संघीयतालाई बलियो बनाउने कानुन निर्माण गर्न संसदको प्रयत्न र प्रयास पर्याप्त नरहेको बताए । उनले लामो राजनीतिक आन्दोलनले धेरै व्यवस्था परिवर्तन गरेको दावी गरे । अब कानुन निर्माणका लागि सबै शक्ति लगाउनुपर्नेमा जोड दिए । 

प्रमुख राजनीतिक शक्तिहरूले जिम्मेवारीबोध गरेर अगाडि बढेमात्र सबै कुरा सम्भव हुने उनले बताए । सभामुखले संविधान संशोधनको बहसका बीच भएको संघीय संसद र प्रदेश सभासहितको सम्मेलन अर्थपूर्ण रहेको बताए । उनले संघीय संसद र प्रदेश सभालाई प्रभावकारी बनाउन अन्तर व्यवस्थापिका सम्मेलन सफल हुने विश्वास व्यक्त गरे । 

राष्ट्रिय सभाका अध्यक्ष नारायणप्रसाद दाहालले संघीयतालाई संस्थागत गर्न धेरै कानुनी प्रबन्ध र व्यवस्थापकीय कार्य बाँकी रहेको बताए । प्रदेश सरकारले दिने डेलिभरीमा भएका समस्याबारे गम्भीर समीक्षा गर्नुपर्ने उल्लेख गरे । कतिपय कानुनको अभावले संघ र प्रदेशबीच खाडल र अन्तरविरोध देखिएको छ,’ उनले भने, ‘संघीय सांसद र प्रदेश सांसदलाई भोट हाल्ने जनता नै अल्मलिने अवस्था रहेको उनको भनाइ छ । 

उनले विगतमा भएका अन्तर व्यवस्थापिका सम्मेलनले कानुन निर्माण र संसदीय अभ्यासलाई प्रभावकारी बनाउन भूमिका निर्वाह गरेको धारणा राखे । सम्मेलनमा संघीय संसदअन्तर्गत प्रतिनिधिसभा र राष्ट्रिय सभा तथा प्रदेशसभाका पदाधिकारीको सहभागिता छ ।