ओलीले स्थान नदिएका वामदेव गौतमलाई साथ लिने तयारीमा छन् माधव नेपाल

२ पुष, काठमाडौं । तत्कालीन नेकपा विभाजन रोक्न असमर्थ भएपछि एमाले परित्याग गरेका वामदेव गौतम पुनः एमालेमा फर्कने वातावरण नबनेपछि माधव नेपाल नेतृत्वको एकीकृत समाजवादीमा समावेश हुने बुझिएको छ । गौतमले औपचारिक रुपमै एमालेमा फर्किएर राजनीतिलाई पूर्णविराम दिने सोच बनाएका थिए । तर, एमाले अध्यक्ष केपी शर्मा ओलीले उनको चाहनालाई महत्व दिएनन् । 

ओलीले गौतमलाई एमाले फर्कने वातावरण बनाउने तिर भन्दा बिगार्ने तिर जोड दिएपछि माधव नेपालले उनलाई आफू मातहतमा ल्याएर उचित स्थान दिने तयारी गरेका छन् । एकीकृत समाजवादीका एक नेताले दिएको जानकारी अनुसार सम्भवतः मंगलबार बामदेव गौतमलाई एकीकृत समाजवादी पार्टीमा लाने कुरामा औपचारिक निर्णय हुनेछ । गौतमले भने माधव नेपालको पार्टीमा जाने कुरा औपचारिक रुपमा जानकारी गराएका छैनन् ।     

माधव नेपाल नेतृत्वको नेकपा एसको स्थायी कमिटी बैठक चलिरहेको छ । बामदेव गौतमलाई पार्टीमा ल्याउनुपर्ने औपचारिक प्रस्ताव नै परेको छ । एमालेका पूर्वउपाध्यक्षसमेत रहेका वामदेव गौतमलाई पार्टीमा भित्र्याउने यो प्रस्तावमाथि आज छलफल भई निर्णय आउनेछ । सोमबारको बैठकमा स्थायी कमिटी सदस्य हरि पराजुलीले उक्त प्रस्ताव पेश गरेका थिए । यसबारे अध्यक्ष नेपालले छलफल गरी वामदेवलाई भित्र्याउने बारेको प्रस्ताव अनुमोदन गराउने बताइएको छ । 

माधव नेपाल नेतृत्वको नेकपा एसले जनताको बहुदलीय जनवादलाई स्वीकार गर्नुपर्ने वामदेवको सर्त रहेको छ । यही विषयमा सहमति नभएका कारण पार्टी प्रवेशमा कुरा मिलेको थिएन । अहिले अध्यक्ष नेपाल र गौतमबीच छलफल भइसकेर यो प्रस्ताव आएको बताइएको छ । गौतमले अहिले पार्टी एकता राष्ट्रिय अभियानको नेतृत्व गरिरहेका छन् । यसमा ७२ सदस्यीय कमिटी छ । आजको बैठकले पार्टी नेताको कार्य विभाजन पनि गर्ने बताइएको छ ।