कास्की जिल्ला अदालतले रवि लामिछानेलाई थप ४ दिन हिरासतमा राख्न दियो अनुमति

२ पुष, पोखरा । सहकारीको रकम दुरुपयोगको अभियोगमा पक्राउ परेका रास्वपा सभापति एवं पूर्वगृहमन्त्री रवि लामिछानेलाई थप ४ दिन हिरासतमा राख्न जिल्ला अदालत कास्कीले अनुमति दिएको छ । प्रहरीले अदालतसँग ४ दिनकै म्याद मागेको थियो । सुर्यदर्शन सहकारी ठगी प्रकरणमा मंगलबार कास्की अदालतले ४ दिन थप हिरासतमै राखेर अनुसन्धान गर्न अनुमति दिएको हो । 

कास्की जिल्ला अदालतका स्रेस्तेदार राजन खनालका अनुसार प्रहरीले मंगलबार चार दिन हिरासतमै राख्न अनुमति मागेको थियो । खनालले जिल्ला सरकारी वकिलको कार्यालयले मागेको समय ४ दिनलाई नै अदालतले सदर गरेको बताए । कास्की प्रहरीले मंगलबार लामिछानेलाई अन्तिम पटक हिरासत म्याद थपको माग गर्दै जिल्ला अदालतमा उपस्थित गराएको थियो । 

न्यायाधीश हिमलाल बेलबासेको २ नं. इजलासमा छोटो बहसपछि उनलाई थप ४ दिन हिरासतमा राखेर अनुसन्धान गर्न अनुमति दिइएको हो । इजलासमा लामिछानेले आफूलाई बाहिरै छाडिदिएको भए के प्रमाण नष्ट गर्थेँ भन्दै न्यायाधीशसँग प्रश्न गरेका थिए । उनीसहितलाई प्रतिवादी बनाएर प्रहरीले सरकारी वकिलसमक्ष अनुसन्धान प्रतिवेदन बुझाइसकेको छ ।