उमागौरी सहकारी प्रकरणः पक्राउ पुर्जी जारी नभएका २५ जनालाई अदालत उपस्थित हुन ३५ दिनको म्याद

२ पुस, काठमाडौं । जिल्ला अदालत मोरङले मोरङको धनपालथान गाउँपालिका–३ मा रहेको उमागौरी कृषि सहकारी संस्था ठगी प्रकरणमा यसअघि मुद्दा चलेका तर, पक्राउ पुर्जी जारी नभएका २५ जनालाई अदालतमा उपस्थित हुन म्याद जारी गरेको छ । यो सहकारी ठगी प्रकरणमा सार्वजनिक लेखा समिति सभापति ऋषिकेश पोखरेलकी पत्नी अञ्जला कोइराला पनि परेकी छन् । 

उनीसहित २५ जनालाई अदालतमा ३५ दिनभित्र उपस्थित हुन म्याद जारी भएको हो । सहकारी ठगी प्रकरणमा जोडिएका अन्य १० जनाविरुद्ध भने यसअघि नै पक्राउ पुर्जी जारी भइसकेको छ । पक्राउ परेकाबाहेक २५ जनाको हकमा म्याद जारी भएको अदालतले जनाएको छ । पोखरेलकी पत्नी कोइराला उमागौरी सहकारीको पूर्वसञ्चालक हुन् । सहकारी संकटमा परेपछि कोइरालाले ५ माघ २०७८ देखि सहकारीबाट राजीनामा दिएकी थिइन् ।

कार्यकर्ताले खोलेको सहकारीको सञ्चालकमा पोखरेलले नै पत्नीको नाम राखेका थिए । शिक्षण पेशामा रहेकी कोइराला सहकारीको कामकाजका बारेमा जानकार थिइनन् । सांसद पोखरेलको सल्लाहमा रौनियारले सहकारी सञ्चालन गर्ने गरेको बताइएको छ । पोखरेलले भने पत्नीलाई अध्यक्ष रौनियारले फसाएको दाबी गर्दै आएका छन् ।

सर्वसाधारणको बचत तथा ऋण अपचलन गरेपछि करिब डेढ वर्षयता सहकारीको कार्यालय बन्द छ । अनुसन्धानमा असहयोग गरेको भन्दै प्रहरीले गत १४ कात्तिकमा सहकारीको कार्यालयको ताला फोडेर कागजात जफत गरेको थियो । उमागौरीले विभिन्न बैंक तथा वित्तीय संस्थाबाट ११ करोड ५६ लाख ७८ हजार रुपैयाँ ऋण लिएको देखिन्छ ।