रातो कारमा ल्याइएको १ सय ९० केजी गाँजा सशस्त्र प्रहरी सुनसरीद्धारा बरामद

२ पुस, सुनसरी । सशस्त्र प्रहरी बल ४ नम्बर गण सुनसरीले धरान उपमहानगरपालिका १३ शिवधारास्थित कोशी लोकमार्गबाट करिब १९० किलोग्राम गाँजा बरामद गरेको छ।

भेडेटारबाट धरानतर्फ आउँदै गरेको बा १० च ६८५२ नम्बरको कारको डिक्कीमा प्लाष्टिकले प्याकिङ गरी ल्याउँदै गरेको उल्लिखित परिमाणको गाँजा सशस्त्र प्रहरी बल, नेपाल सुरक्षा वेस क्याम्प धरानका बेस प्रमुख सशस्त्र डीएसपी देवेन्द्रबहादुर सिंहको कमाण्डमा खटिएको टोलीले बरामद गरेको हो ।

सशस्त्र प्रहरीको डिउटी टोलीलाई देखेपछि भेडेटारबाट धरानतर्फ आउँदै गरेको बा १० च ६८५३ नम्बरको रातो सुजुकी कार चालकले गाडीलाई अकस्मात् सडकमै छाडी कार चालक फरार भएका छन् ।

सशस्त्र प्रहरीले तत्कालै उक्त कारलाई चेकजाँच गर्दा उक्त कारमा प्लाष्टिकमा प्याकिङ गरिएको १९० केजी प्रतिबन्धित लागुऔषध गाँजा फेला परेको साथै सोही कारसँगै आएको को ३५ प २०४५ नम्बरको डुक मोटरसाइकलमा सवार दुई जनालाई पनि नियन्त्रणमा लिन सफल भएको छ । 

गाँजा तस्करीको स्कटिङ गर्ने सुनसरी बराहक्षेत्र नपाका कर्णबहादुर पाण्डे र जिल्ला धनकुटा धनकुटा नपाका सलमान राई पक्राउ परेका हुन् । उनीहरूसँग थप सोधपुछ तथा निजहरुको साथमा रहेको मोबाइल फोन अनुसन्धान गर्ने क्रममा उक्त गाँजा तस्करमा संलग्न रहेको साथै किनबेच तथा बाटो स्कर्टिङ्ग गर्ने कार्यमा समेत संलग्न रहेको पाइएको हुँदा उक्त गाँजा,व्यक्ति, मोटरसाइकल र कारलाई नियन्त्रणमा लिई आवश्यक कारबाहीको लागि इलाका प्रहरी कार्यालय धरानमा बुझाइएको सशस्त्र प्रहरी बल ४ नम्बर गण सुनसरीका एसपी समनेन्द बज्राचार्यले नेपालबहसलाई जानकारी दिएका छन् ।