३ करोड २१ लाख अवैध सम्पत्ति आर्जनको अभियोग लागेका कार्कीलाई विशेषले दियो सफाइ

२ पुष, काठमाडौं । विशेष अदालतले ३ करोड २१ लाख ३२ हजार बराबरको अकुत सम्पत्ति आर्जन गरेको अभियोग लागेका शाखा अधिकृत यामकुमार कार्कीलाई सफाइ दिएको छ । काठमाडौं उपत्यका विकास प्राधिकरणका अधिकृत कार्कीले अदालतबाट सफाइ पाएका हुन् । 

गत ८ चैतमा अख्तियार दुरुपयोग अनुसन्धान आयोगले दायर गरेको भ्रष्टाचार मुद्दामा फैसला सुनाउँदै बिशेष अदालतले मंगलबार सफाइ दिएको हो । बिशेष अदालतका अध्यक्ष टेकनाराण कुँवर तथा सदस्यहरू तेज नारायण सिंह राई र रितेन्द्र थापाको इजलाशले सफाइ दिने फैसला गरेको हो । कार्कीले सरकारी जग्गा व्यक्तिको नाममा दर्ता गरी अकुत आर्जन गरेको उजुरीमा आयोगले अनुसन्धान गरी मुद्दा दायर गरेको थियो । 

कार्की २०५८ साल साउनमा सरकारी सेवामा प्रवेश गरेकोमा २०७९ चैतसम्मको मूल्याङकनमा उनीसँग सरकारी मूल्याङकनअनुसार ६ करोड ९८ लाख ४६ हजार रुपैयाँ बराबरको सम्पत्ति भेटिएको थियो । त्यसमध्ये तीन कराड २१ लाख ३२ हजार रुपैयाँ बराबरको स्रोत खुलाउन नसकेको भन्दै सोही बिगो कायम गरी अख्तियारले मुद्दा दायर गरेको थियो । यस्तो सम्पत्ति उनले पत्नी देवका अधिकारी तथा छोरी गृष्मा कार्कीको नाममा समेत राखेको भन्दै उनीहरुलाई समेत सम्पत्ति जफतको प्रयोजनका लागि आयोगले प्रतिवादी बनाएको थियो ।