दुर्गा प्रसाईंका छोरा निराजनले वारेसमार्फत दिएको दोस्रो बन्दी प्रत्यक्षीकरण रिट पेशीमा चढ्यो

३ पुष, काठमाडौं । मेडिकल व्यवसायी दुर्गा प्रसाईंका छोरा निराजनले  थुनामुक्त गर्न दोस्रो पटक सर्वोच्च अदालतमा दिएको बन्दी प्रत्यक्षीकरण रिट सुनुवाइका लागि पेशीमा चढेको छ । यो रिट बुधबार न्यायाधीश सुनिलकुमार पोखरेलको इजलासमा परेको छ ।

उनको यसअघिको बन्दीप्रत्यक्षीकरणकै रिट सर्वोच्चले खारेज गरिदिएको थियो । काठमाडौं जिल्ला अदालतले साइबर अपराधबाहेक अर्कोमा म्याद थप गरेपछि निराजनले दोस्रो रिट दर्ता गराएका थिए । प्रसाईंविरुद्ध काठमाडौं जिल्ला अदालतमा साइबर अपराधको मुद्दा दायर भएको छ । 

प्रहरीले दुःख दिने मनसाय राखेर पक्राउ र म्याद थप गराएको दाबीसहित छोरा निराजनले मंगलबार अर्को रिट दर्ता गराएका थिए । यसपटक निराजनको वारेस भएर नारद खवासले रिट दर्ता गराएका छन् । प्रसाईं क्यान्सरजस्तो गम्भीर रोगको बिरामी भएको रिट निवेदनमा उल्लेख छ ।