कर्णाली याक्स दोस्रो क्वालिफायरमा प्रवेश, २१ रनले हारेको चितवन राइनोजले १५ लाख पाउने

३ पुष, काठमाडौं । नेपाल प्रिमियर लिग (एनपीएल) को इलिमिनेटरको खेलमा चितवन राइनोजलाई २१ रनले पराजित गर्दै कर्णाली याक्स दोस्रो क्वालिफायरमा प्रवेश गरेको छ । कर्णालीले अब फाइनल प्रवेशका निम्ति दोस्रो क्वालिफायरमा जनकपुर बोल्ट्स वा सुदूरपश्चिम रोयल्समध्ये एक टिमसँग प्रतिस्पर्धा गर्नेछ ।

हारसँगै प्रतियोगिताबाट बाहिरिएको चितवन राइनोजले चौथो स्थान सुनिश्चित गरेसँगै १५ लाख रुपैयाँ पुरस्कार पाउने भएको छ । बुधबार कीर्तिपुरस्थित त्रिवि क्रिकेट मैदानमा कर्णालीले प्रस्तुत गरेको १७६ रनको लक्ष्य पछ्याउने क्रममा चितवनले निर्धारित २० ओभरमा नौ विकेट गुमाएर १५४ रन मात्र बनाउन सक्यो ।

कर्णालीले दोस्रो क्वालिफायरमा जनकपुर बोल्ट्स र सुदूरपश्चिम रोयल्सबीचको खेलमा पराजित हुने टोलीसँग प्रतिस्पर्धा गर्नेछ । आजै जनकपुर र सुदूरपश्चिमबीच पहिलो क्वालिफायर हुँदैछ । यो खेलको विजेता टोली फाइनल पुग्नेछ । बुधबार कर्णालीले दिएको १७६ रनको लक्ष्य पछ्याएको चितवनले २० ओभरमा ९ विकेटको क्षतिमा १५४ रन मात्र जोड्न सकेको हो । 

चितवनका लागि रवी बोपाराले अर्धशतक प्रहार गरे पनि त्यो जितका लागि पर्याप्त हुन सकेन । १८औं ओभरमा नन्दन यादवको बलमा गुल्सन झाबाट क्याच हुनुअघि उनले ५३ रन जोड्ने क्रममा ३४ बलमा ३ चौका र ४ छक्का प्रहार गरे । चितवनको ब्याटिङ कुनै पनि बेला सम्हालिन सकेन । 

ओपनर हसन इशाखिल पहिलो ओभरमा एक रनमा आउट भए । अर्का ओपनर विपिन रावलले भने १८ रन बनाए । दुवैलाई कर्णालीका कप्तान सोमपाल कामीले गुल्सन झाबाट क्याच गराए । विपिन तेस्रो ओभरमा आउट भएका थिए । लुक बेन्केस्टाइनले १६ रन र कप्तान कुशल मल्ल २१ रन जोडेर आउट भए । १६ औं ओभरमा कर्णालीका मक्सुदले दुई विकेट लिए । उनले सन्तोष कार्कीलाई ८ रन र सोहेल तन्विरलाई ४ रनमा क्याच गराएका थिए ।

१८ औं ओभरमा अमरसिंह रटेउला ९ रन बनाएर खेलिरहदा नन्दन यादवबाट बोल्ड भएका थिए । दोस्रो बलमा अमर पेभिलियन फर्किएपछि पाँचौ बलमा रवी बोपारा पनि छक्का प्रहार गर्ने क्रममा बोपारा पनि आउट भए । बोपारा आउट भएसँगै आठ विकेट गुमाएको चितवन हार नजिक पुगेको थियो । अन्तिम ओभरमा रिजन ढकाल ७ रनमा रनआउट हुँदा शरद भेषवाकरले बलिङमा कर्णालीका जीशन मक्सुदले ३ विकेट लिए । उनले ४ ओभरमा २६ रन खर्चिए । 

कप्तान सोमपाल कामी र नन्दन यादवले  २–२ विकेट लिए भने विपिनप्रसाद शर्माले १ विकेट हात पारे । त्यसअघि कीर्तिपुरस्थित त्रिवि मैदान टस जितेको चितवनले फिल्डिङ रोजेपछि पहिले ब्याटिङ गरेको कर्णालीले ६ विकेटको क्षतिमा १७५ रन जोड्यो । जारी एनपिएलमा कर्णालीको यो उच्च योगफल हो ।