बैंक ऋण नतिर्ने भन्दै दुर्गा प्रसाईंले दिएको रिट उच्च अदालत विराटनगरले खारेज गर्यो

३ पुस, विराटनगर । उच्च अदालत विराटनगर, इलाम इजलासले बैंक ऋण नतिर्ने भन्दै मेडिकल व्यवसायी दुर्गा प्रसाईंले दायर गरेको रिट खारेज गरिदिएको छ । उनले बैंकको ऋण नतिर्ने अभियान नै चलाएका थिए । अब बैंकहरुलाई उनले लिएको ऋण उठाउने बाटो खुलेको छ ।

बैंकले ऋण असुल गर्न ताकेता गरेपछि प्रसाईंले उच्च अदालत विराटनगर, इलाम इजलासमा निषेधाज्ञाको मागसहित रिट दायर गरेका थिए । मुख्य न्यायाधीश विपुल न्यौपाने र न्यायाधीश काजीबहादुर राईको इजलासले मंगलबार उक्त रिट खारेज गरेको हो । चार वटा बैंकविरुद्ध प्रसाईंको पक्षबाट टीकाराम अधिकारीले रिट दायर गरेका थिए । यो रिट खारेज भएको हो । 
 
उच्च अदालत विराटनगर, इलाम इजलासका सूचना अधिकारी युगेनकाजी बान्तवाले मंगलबार रिट खारेज भएको जानकारी दिएका हुन् । रिट खारेज गर्दै अदालतले मिति २०८०–१– १० को पत्रको प्रयोजन नै समाप्त भइसकेको देखिएकोसमेतबाट प्रस्तुत निवेदनमा निवेदकको माग बमोजिमको आदेश जारी गर्नुपर्ने विद्यमान अवस्था देखिएन भनेको छ ।