बिहीबार १० अर्ब आन्तरिक ऋण उठाउँदै छ सरकार

३ पुष, काठमाडौं । सरकारले बिहीबार १० अर्ब आन्तरिक ऋण प्रयोजनका लागि खर्च उठाउने भएको छ । आन्तरिक ऋण संकलनका लागि सार्वजनिक ऋण व्यवस्थापन कार्यालयले सूचना जारी गरेको छ । जसअनुसार भोलि (बिहीबार) १० अर्बको ऋणपत्र बिक्री गरिनेछ । 

ऋणपत्र २०८६ नाम दिइएको उक्त ऋणपत्रको परिपक्व अवधि ६ वर्षको हुनेछ । ऋणपत्रको ब्याजदर बोलकबोलबाट निर्धारण हुनेछ । ऋणपत्र बैंक तथा वित्तीय संस्था, गैरबैंक वित्तीय संस्था, बिमा कम्पनी, संगठित संस्था तथा नेपाली नागरिकले खरिद गर्न सक्नेछन् ।

यो ऋणपत्र धितो राखेर बैंक तथा वित्तीय संस्था र राष्ट्र बैंकबाट ऋण लिन सकिन्छ भने ऋणपत्रको ब्याज अर्धवार्षिक रूपमा भुक्तानी हुनेछ । ऋणपत्रमा घटीमा ५० हजार र बढीमा कुल निष्कासित रकमको सीमामा नबढाई ५० हजारले भाग गर्दा निःशेष भाग जाने अंकमा लगानी गर्न सकिने राष्ट्र बैंकको सूचनामा उल्लेख छ ।