५ अंकले घटेर २६२८ मा बन्द भयो नेप्से, ४ अर्ब २७ करोडका शेयर किनबेच भए

३ पुष, काठमाडौं । बुधबार नेप्से परिसूचक सामान्य अंकले घटेर बन्द भएको छ । नेप्से ५.६० अंकले घटेर २६२८.२६ विन्दुमा बन्द भएको छ । यसदिन नेप्से परिसूचकसँगै कारोबार रकम पनि घटेको छ । गत कारोबार दिन अर्थात् मंगलबार ४ अर्ब ३४ करोडको शेयर कारोबार भएकोमा बुधबार ४ अर्ब २७ करोडको कारोबार भएको छ । अघिल्लो दिनको तुलनामा कारोबार रकममा ७ करोडले कमी आएको हो ।

कारोबार रकमका आधारमा जानकी फाइनान्स शीर्ष स्थानमा रह्यो । सो कम्पनीको १५ करोड मूल्य बढिको शेयर कारोबार भयो । रिभर फल्स पावरको १२ करोड, एनआरएन इन्फ्रास्टक्चर एण्ड डेभलपमेन्टको ११ करोड, नेपाल फाइनान्सको १० करोड र सिकलेस हाइड्रोपावरको ८० करोड मूल्य बराबरको शेयर कारोबार भयो ।

नेप्से घटेसँगै कारोबार रकम पनि मंगलबारको तुलनामा घटेको छ । आज ३१४ स्क्रिप्सको ८१ लाख ४७ हजार ३२० कित्ता शेयर ४ अर्ब  २७ करोड ८२ हजार ५७५ रुपैयाँमा कारोबार भयो । दुई कम्पनीको शेयर सकारात्मक सर्किट लेभलमा कारोबार हुँदा कुथेली बुखारी स्माल हाइड्रोपावरका लगानीकर्ताले भने सर्वाधिक गुमाए । कुथेली बुखारीको शेयर ९.९० प्रतिशतले घट्यो ।

तीन समूहबाहेक अन्य समूहको उपसूचक नकारात्मक देखिए । फाइनान्स, माइक्रोफाइनान्स र ट्रेडिङ समूहको उपसूचक बढ्दा अन्य समूहको उपसूचक नकारात्मक देखियो । कारोबारमा आएका स्टक्समध्ये ८१ वटाको मूल्य बढ्यो भने १४९ वटाको घट्यो । १२ वटा स्टक्सको मूल्य भने स्थिर रह्यो ।