पहिलो पटक सीआरएन नम्बर र शेयर आवेदन सेवा सिटिजन्स मोबाइल बैंकिङ एपमा

३ पुस, काठमाडौं । डिजिटल बैंकिङलाई उच्च प्राथमिकतामा राख्दै बिगत अठार वर्षदेखि आम नेपाली सर्वसाधारण ग्राहकहरु माझ सर्वसुलभ बैंकिङ सेवा पुर्याउँदै आएको सिटिजन्स बैंक इन्टरनेशनल लिमिटेडले सीडीएस एण्ड क्लियरिङ्ग लिमिटेडको अनुमति पश्चात् नेपालमै पहिलो पटक सिटिजन्स मोबाइल बैंकिङ एपमार्फत नै “शेयर आवेदन र सीआरए (CRN) नम्बर” सेवा लिन सकिने व्यवस्था मिलाएको छ ।

अब सिटिजन्स मोबाइल बैंकिङ एपमार्फत ग्राहकहरूले सिधैं आईपीओ, एफपीओ तथा हकप्रद शेयर (IPO/FPO/ Right Share) का लागि आवेदन दिन सक्नुका साथै सीआरएन नम्बरको लागि समेत आवेदन दिन सक्नेछन् । कारोबार सफलताको जानकारी ग्राहकले वास्तविक समय (Real Time) मा नै प्राप्त हुने बैंकले जनाएको छ ।

आईपीओ, एफपीओ तथा हकप्रद शेयर आवेदनको भेरिफिकेशन (Verification) वा अस्वीकृत Rejection को Real-Time Response / Real Time CRN नम्बर उपलब्धता पश्चात् ग्राहकहरूले बैंकको शाखा कार्यालय नगई सहज र झन्झट मुक्त सुविधा प्राप्त गर्न सक्ने  बैंकले जनाएको छ । ग्राहकहरूलाई अझ सरल र प्रभावकारी सेवा प्रदान गर्न यस व्यवस्थाले ठूलो भूमिका खेल्नेछ र यसले कर्मचारीको कार्य दक्षता र ग्राहक सन्तुष्टिमा महत्वपूर्ण सुधार ल्याउनेछ ।

हालसालै मात्र विश्वकै प्रतिष्ठित अवार्ड  'बैंक अफ द ईयर २०२४' को उपाधि प्राप्त गर्न सफल भएको बैंकले केही समय अघि मात्र फोन पेसँगको सहकार्यमा नेपालमै पहिलो पटक “सिटिजन्स फोनपे क्रेडिट कार्ड” सञ्चालनमा ल्याएको छ । सिटिजन्स बैंक इन्टरनेशनल लिमिटेडले देशैभरी ६० जिल्लामा फैलिएका आफ्ना १९७ वटा शाखा, १६२ वटा एटीएम., ३ विस्तारित काउन्टर र ७४ वटा शाखारहित बैंकिङ्ग ईकाइहरुबाट १८ लाख भन्दा बढी ग्राहक वर्गलाई आधुनिक बैंकिङ्ग सेवाहरु प्रदान गर्दै आएको छ ।