रविको अनुसन्धान प्रतिवेदन बुझाएसँगै जीबीलाई नेपाल ल्याउने पहल

४ पुस, काठमाडौं । सहकारी ठगी प्रकरणमा रवि लामिछाने विरुद्धको अनुसन्धान प्रतिवेदन सरकारी वकिल कार्यालय बुझाए लगत्तै प्रहरीको ध्यान गितेन्द्रबाबु (जीबी) राईलाई नेपाल ल्याउनमा केन्द्रित भएको छ । गृहमन्त्रालयले कुटनीतिक तबरबाट राइलाई नेपाल ल्याउन पहल गरिरहेको बेला प्रहरीको विशेष व्यूरोले यसका पहल गरिरहेको स्रोतको दावी छ ।

सहकारी ठगी र संगठित अपराधमा अनुसन्धान गर्न पक्राउ पूर्जी जारी भएका पोखरास्थित सूर्यदर्शन सहकारीका अध्यक्ष गितेन्द्रबाबु (जीबी) राईलाई नेपाल ल्याउन कुटनीतिक पहल थालिएको हो ।यसकालागि गृहमन्त्रालयको आग्रहमा परराष्ट्र मन्त्रालयले  पहल थालेको छ । तर यसलाई सरकारले गोप्य राखेको छ । राईलाई प्रधानमन्त्री केपी शर्मा ओलीको कुटनीतिक पहलबिना नेपाल ल्याउन असम्भव भएको ब्रिफिङ नेपाल प्रहरीले गृह मन्त्रालयमार्फत प्रधानमन्त्रीसम्म पु¥याएपछि यस्तो हिल थालिएको हो । यसमा नेपाल प्रहरीको विशेष व्यूरोलाई पनि सहभागी गराइएको छ ।

महानिरीक्षक बसन्तबहादुर कुँवरसहितका प्रहरीका उच्च अधिकृतहरूले मलेसियामा रहेका भनिएका राईलाई नेपाल ल्याउन प्रधानमन्त्रीभन्दा तल्लो तहका प्रयास भएको र अब प्रधानमन्त्रीकै प्रयास भएमा ल्याउन सकिने ब्रिफिङ भएको थियो । कास्की र रूपन्देही प्रहरीले पत्राचार गरेपछि प्रहरी प्रधान कार्यालयको इन्टरपोल शाखाले जीबीविरुद्ध गत माघ १३ मा डिफ्यूजन र फागुन २१ मा रेड नोटिस जारी गरेपछि उनलाई नेपाल ल्याउन प्रहरीले भरमग्दुर प्रयास गरेको थियो ।

जीबीलाई नेपाल ल्याउन गृह मन्त्रालयले परराष्ट्र मन्त्रालयमार्फत् मलेसियामा कूटनीतिक नोट पठाएएको थियो । गत फागुनमा पठाएको कूटनीतिक नोटको जवाफ मन्त्रालयले अहिलेसम्म पाएको छैन । त्यतिमात्र होइन, प्रहरी प्रधान कार्यालयले एसपीको कमाण्डमा दुई जनालाई मलेसिया पठाएको थियो । जीबी बसेको फ्ल्याट पत्ता लगाए पनि उनलाई नेपाल ल्याउने सम्भावना नदेखिएपछि प्रहरी टोली रित्तै फर्किन बाध्य भएको थियो । क्वालालम्पुरस्थित देशापन्डनमा अपार्टमेन्ट खरिद गरेर बसेका जीबीलाई नेपाल र मलेसियाबीच ‘सुपुर्दगी सन्धि’ नभएका कारण नेपाल ल्याउन सम्भव नभएको प्रहरी र गृह मन्त्रालयका अधिकृतहरू बताउँछन् ।

‘मेक मलेसिया माई सेकेन्ड होम’ अवधारणाअनुसार जीबीले त्यहाँ ७ करोड नेपाली रुपैयाँभन्दा बढीमा अपार्टमेन्ट खरिद गरेर बसेका छन् । यो अवधारणामा तोकिएको रकम बस्नेले मलेसियन सरकारलाई तिर्नपर्छ । त्यसपछि उसको मुलुकमा मलेसियन सरकारले फिर्ता गर्दैन । त्यसकै कारण कुटनीतिक नोट र नेपाल ल्याउन मलेसिया पु्गेको प्रहरी टोली रित्तो हात फर्किएको थियो ।

जीबी अध्यक्ष रहेको सूर्यदर्शन सहकारीबाट रकम अपचलन गरेर गोरखा मिडियामा लगानी गरेको आरोपमा कास्की प्रहरीले मिडियाका तत्कालीन प्रबन्ध निर्देशक रवि लामिछाने र सञ्चालक छविलाल जोशीलाई पक्राउ गरी अनुसन्धान सिध्याएर प्रतिवेदन सरकारी वकिल कार्यालयमा पठाएको थियो । संसदीय छानबिन समितिले पाँच वटा सहकारीबाट गोरखा मिडियामा ६५ करोड ५४ लाख रुपैयाँ लगेर अपचलन गरिएको प्रतिवेदनमा उल्लेख गरेको छ ।