अस्पष्ट तस्वीरमा रास्वपाको प्रोपोगान्डा, के हो वास्तविकता ?

४ पुस, काठमाडौं । गएराति देखि रास्वपा सभापति रवि लामिछानेको प्रहरी हिरासतमा रहेको तस्वीर भनेर सामाजिक सञ्जालमा हंगामा मच्चाइएको छ । नेपाल प्रहरी र हिरासतको गोपनीयताबारे विभिन्न प्रश्नहरू उठिरहेका छन् । तर, प्रहरी प्रशासनले भने यसको ठोस जवाफ दिएको छैन । रास्वपाका समर्थकहरूले यो तस्वीर रवि लामिछानेकै भएको दावी गर्दै सामाजिक सञ्जालमा मनलाग्दी गाली गरिरहेका छन् भने अर्कोथरीले यो रविको तस्वीर नभएको दावी गरिरहेका छन् ।   

रविका समर्थक डा. निकोलस भुसालले यो तस्वीर आफूले खिचेको भनेर दावी गरेका छन् । तर, प्रहरीले तस्वीर कस्को हो र रविकै भए पनि कसरी खिचियो र सार्वजनिक गरियो भन्ने जवाफ दिन सकेको छैन । डा. भुसालले सामाजिक सञ्जालमा भाइरल भइरहेको रवि लामिछानेको फोटो आफूले खिचेको भन्दै माफी पनि मागेका छन् । उनले यसमा कुनै खराब नियत नभएको भन्दै उनले गल्ती महसुस गर्दै माफी मागेको बताएका छन् । 

तस्वीर सार्वजनिक भएपछि एमालेका महासचिव शंकर पोखरेलले कसैलाई लक्षित नगरी सामाजिक सञ्जालको प्रोपोगाण्डा भनेका छन् । उनले सञ्जालको प्रोपोगान्डाबाट उदाएकाहरू त्यसैको दुरुपयोगबाट विस्थापित हुने बाटोमा हिँडेको दावी गरेका छन् । महासचिव पोखरेलले सोसल मिडियाको स्टन्ट र प्रोपोगान्डाबाट उदाएकाहरू त्यसैको चरम दुरुपयोगबाट विस्थापित हुने बाटोमा अग्रसर देखिएको भनेर टिप्पणी गरेका छन् ।
 
गएराति देखि रास्वपा सभापति रवि लामिछानेको हिरासतको तस्बिर राखेर रास्वपाका नेता–कार्यकर्ताहरूले भने प्रहरीमाथि प्रश्न उठाइरहेका छन् । बुधबार साँझ राष्ट्रिय स्वतन्त्र पार्टीका सह–कोषाध्यक्ष दीपक बोहोराले सामाजिक सञ्जालमा यो तस्बिर पोस्ट गर्दै सरकार र नेपाल प्रहरीमाथि प्रश्न उठाएका थिए । यसपछि रास्वपा समर्थकहरू खुलेर लागेका छन् । 

खासमा डा. भुसाल को हुन भन्ने पनि प्रहरीले बताएको छैन । तस्वीर भाइरल भएपछि यसको फाइदा लिन उनले दावी गरेको पनि हुनसक्छ । तर, खासमा तस्वीर रवि लामिछानेकै हो भनेर किटान गर्न सकिने आधार छैन । अहिले प्रहरीले हिरासतभित्रको फोटो सार्वजनिक गरिदिएको भन्दै सर्वत्र आलोचना भइरहेको छ । 

भुसालले आफू रविको स्वास्थ्य जाँचका लागि हिरासतमा गएको र त्यही बेला प्रहरीकै सामुन्ने फोटो खिचेको बताएका छन् । रविको स्वास्थ्य ठिक छ भन्ने देखाउनका लागि पनि फोटो खिचेको उनको भनाइ छ । भाइरल गराउँछु भन्ने सोचेर, फाइदा हुन्छ भन्ने सोचेर या कसैलाई दोष लगाउनका लागि, कसैलाई नराम्रो भन्नका लागि’ फोटो नखिचेको प्रष्टीकरण उनले दिएका छन् ।

कास्की प्रहरीले भने रविको भनिएको भाइरल फोटोको वास्तविकता पत्ता लगाउन अनुसन्धान गरिरहेको जनाएको छ । कानुनका जानकारहरूका अनुसार यसरी अनुमति विना कसैको फोटो खिच्न र सार्वजनिक गर्न पाइँदैन । कसैको फोटो अनुमति विना खिच्नु, तोडमोड गर्नु र सार्वजनिक गर्नु दण्डनीय छ । मुलुकी संहितामै यो व्यवस्था छ । न्यायिक हिरासतमा राखेको व्यक्तिको पनि फोटो भिडियो सार्वजनिक गर्न पाइँदैन । तर, कसरी सार्वजनिक भयो भन्दा पनि फोटो रविको हो कि हैन भन्नेमै प्रहरी दुविधामा देखिएको छ ।