सभापति देउवाको गृह प्रदेशमा कोइरालाको प्रवेश, उत्साहित छन नेता र कार्यकर्ता

४ पुष, कैलाली । नेपाली कांग्रेसका वरिष्ठ नेता डा. शेखर कोइरालाको २०८१ पुष ५ गतेदेखि सुदूरपश्चिमको भ्रमणमा आउने तय भएको छ । उनको यो भ्रमण र भेटघाटलाई नेता तथा कार्यकर्ताले पनि सहज रुपमा लिएका छन् । कोइरालाले सुदूरको ९ वटै जिल्लाका प्रतिनिधिहरूसँग भेट गर्ने र पछिल्लो राजनीतिक परिस्थितिका बारेमा जानकारी दिने कार्यक्रम छ । अहिले सबैले कोइरालालाई कांग्रेस वरिष्ठ नेता हाम्रो क्षेत्रमा आउन लागेको रुपमा अर्थ्याइएको छ । 

यसअघि नेताका यस्ता भ्रमण समूहगत रुपमा हेर्ने गरिएका थिए । संस्थापन र इतर समूह भनेर कार्यक्रम नै छुट्याइने गरिएको थियो । तर, यो पटक संस्थापन समूहका नेता कार्यकर्ताले पनि कोइरालालाई स्वागत गर्ने, भेट गर्ने र आफ्ना गुनासाहरू राख्ने तयारी गरेका छन् । उनलाई समग्र कांग्रेसको नेताका रुपमा लिइएको छ । कोइराला सुदुरपश्चिममा आएपछि उनकै समूहले फरक व्यवहार गरेमात्र नत्र देउवा पक्षका भनेर चिनिएका नेताहरूले पनि उनको स्वागत र भेटघाटको कार्यक्रम बनाएका छन् ।  

उनी सुदूरपश्चिममा रहेका बेला भेट गर्ने र यहाँको वस्तुस्थितिबारे जानकारी गराउन कतिपय देउवा पक्षकै नेताहरु पनि काठमाडौंबाट सुदूर आउने बुझिएको छ । कोइरालाको निजी सचिवालयले जनाएको अनुसार भ्रमण अवधिभर उनले धनगढीमा ९ वटै जिल्लाका कार्यकर्तासँग भेटघाट तथा पार्टीका विभिन्न कार्यक्रमलाई सम्बोधन गर्ने तालिका रहेको छ । 

सचिवालयले जनाए अनुसार, डा. कोइरालाले पुष ५ गते शुक्रबार धनगढीमा सुदूरपश्चिमका ९ वटै  जिल्लाका नेता तथा कार्यकर्तालाई भेटघाट तथा अन्तरक्रिया गरिने कार्यक्रम रहेको छ । उनले हरेक जिल्लाका नेता तथा कार्यकर्तालाई फरक फरक समयमा भेट्ने र जिल्लागत विभिन्न विषयमा छलफल हुनेछ । शुक्रबार उनी दिनभर भेटघाटमै व्यस्त रहने तालिका रहेको छ । 

पुष ६ गते भातृ तथा शुभेच्छुक संस्थाहरूसँगको भेटघाट रहेका छ । सोही दिन दिउँसो डा. कोइरालाले नेपाल प्रजातान्त्रिक सेनानी संघ, सुदूरपश्चिम प्रदेशको प्रथम प्रदेश अधिवेशनको उद्घाटन तथा सम्बोधन गर्ने कार्यक्रम रहेको छ । डा. कोइरालासँगै नेपाली कांग्रेसका नेता हृदयराम थानी, डा. गोविन्दराज पोखरेल, सुनिल शर्मा लगायतका नेताहरूले प्रदेश अधिवेशनलाई सम्बोधन गर्ने कार्यक्रम रहेको छ । 

डा शेखर कोइरालालाई भेट्न सुदूरपश्चिमका ९ वटै जिल्लाबाट स्थानीय तहका प्रतिनिधि, जिल्ला तथा स्थानीय तहका पार्टी सभापति तथा पदाधिकारी तथा नेता कार्यकर्ता धनगढी आउनेक्रम शुरु भइसकेको छ । डा. कोइराला सुदूरपश्चिम आउने खबरले स्थानीय नेता तथा कार्यकर्ता निकै उत्साही भएका छन् । नेपाली कांग्रेसका पार्टी सभापति शेरबहादुर देउवाको गृह प्रदेशमा हुने डा. कोइरालाको यो भ्रमणलाई पार्टी भित्र र बाहिर निकै चासोको साथ हेरिएको छ ।