३१ अंकले घटेर २६ सय तल झर्यो नेप्से: कारोबारमा सुधार, ४ अर्ब ७६ करोडका शेयर किनबेच

४ पुष, काठमाडौं । बिहीबार शेयरबजार ३१.४३ अंकले घटेर बन्द भएको छ । नेप्से परिसूचक १.१९ प्रतिशतले घटेर २५९६.८२ विन्दुमा बन्द भएको छ । बुधबार नेप्से २६२८.२६ विन्दुमा बन्द भएको थियो । आज नेप्से परिसूचक घटेपनि कारोबार रकम भने केही बढेको छ । 

गत कारोबार दिन अर्थात् बुधबार ४ अर्ब २७ करोडको शेयर कारोबार भएकोमा बिहीबार ४ अर्ब ७६ करोडको कारोबार भएको छ । अघिल्लो दिनको तुलनामा कारोबार रकममा ४९ करोडले वृद्धि भएको छ । आज ३१० वटा धितोपत्रको ९८ लाख ३२ हजार ३०८ कित्ता शेयर किनबेच भएको हो ।

बिहीबार २९ कम्पनीको शेयर मूल्य बढेको छ भने २११ वटाको घटेको छ । तीन कम्पनीको मूल्य स्थिर रहेको छ । आज चार अर्ब ७६ करोड रुपैयाँको शेयर खरिद–बिक्री भएको छ । आरम्भ चौतारी लघुवित्त वित्तीय संस्था, जीवन विकास लघुवित्त वित्तीय संस्था र पिपुल्स पावर लिमिटेडको शेयर मूल्य स्थिर रहेको छ ।

कारोबारमा आएका १३ समूहकै परिसूचक घटेको छ । परिसूचक सर्वाधिक घट्नेमा व्यापार समूह छ । यो समूहको परिसूचक २.७३ प्रतिशतले घटेको छ । फाइनान्स समूहको परिसूचक २.३१ प्रतिशतले घटेको छ । सपोर्ट माइक्रो फाइनान्स लघुवित्त वित्तीय संस्थाको शेयर मूल्य १० प्रतिशतले बढेको छ । सामुदायिक लघुवित्त वित्तीय संस्थाको सेयर मूल्य ५.०९ प्रतिशतले वृद्धि भएको छ ।