कर्णालीलाई हराउँदै एनपीएलको फाइनलमा पुग्यो जनकपुर, उपाधिका लागि सुदूरपश्चिमसँग भिड्ने

४ पुष, काठमाडौं । दोस्रो क्वालिफायरमा कर्णाली याक्सविरुद्ध दुई विकेटको रोमाञ्चक जित निकाल्दै जनकपुर बोल्ट्सले नेपाल प्रिमियर लिग (एनपीएल)को फाइनलमा स्थान बनाएको छ । अब जनकपुरले उपाधिका निम्ति सुदूरपश्चिम रोयल्ससँग प्रतिस्पर्धा गर्नेछ ।

नेपाल प्रिमियर लिगको फाइनलमा सुदूरपश्चिम रोयल्सको सामना जनकपुर बोल्ट्ससँग हुने भएको हो ।  कीर्तिपुरको टीयू मैदानमा भएको ‘लो स्कोरिङ’ क्वालिफायर–टुको खेलमा जनकपुरले कर्णाली याक्समाथि दुई विकेटको जित निकाल्यो ।

फाइनल शनिबार हुनेछ । सुदूरपश्चिमले जनकपुरलाई नै क्वालिफायरमा वानमा पराजित गर्दै फाइनल पुगेको थियो । जनकपुरका लागि जिमी नीशमले १७ बल खेल्दै २ चौका र ५ छक्काको मदतमा सर्वाधिक ४५ रन बनाए । 

आक्रामकरूपमा प्रस्तुत भएका निसमले करिब २६५ को स्ट्राइक रेटमा ब्याटिङ गर्दै १७ बलमा दुई चौका र पाँच छक्का प्रहार गरे । निसमलाई १५.३ ओभरमा विपीन शर्माले बोल्ड गरे । निसम आउट हुँदा जनकपुरलाई जितका निम्ति २७ बलमा २५ रनको आवश्यकता थियो । सोही ओभरको अन्तिम बलमा विपीनले जनकपुरका मोहमद मोहसिनलाई एलबीडब्लूको धरापमा पारेपछि खेल रोमाञ्चक मोडमा पुगेको थियो ।