स्क्यानर मेसिन किनिदिने सर्तमा छुटे जिल्ला प्रशासन कार्यालयमा तोडफोड गर्ने अध्यक्ष थापामगर

५ पुस, गुल्मी । गुल्मी जिल्ला प्रशासन कार्यालयमा तोडफोड गरेको आरोपमा पक्राउ परेका कालीगण्डकी गाउँपालिका अध्यक्ष बेद थापामगरलाई प्रहरीले बिहीबार साँझ नै छाडेको छ । उनले फुटाएको स्क्यानर मेसिन किनिदिने सर्तमा रिहा गरिएको प्रहरीले जनाएको छ । 

बिहीबार अपराह्न मगरले प्रशासन कार्यालयमा रहेको राहदानी फाँटको स्क्यानर फुटाएका थिए । प्रमुख जिल्ला अधिकारी जनार्दन गौतमले वार्ता भइरहेका बेला आवेगमा आएर अध्यक्ष थापामगरले तोडफोड गरी स्क्यानर मेसिन फुटाएको र त्यसपछि प्रहरीले पक्राउ गरेको बताए । 

थापाले कालिगण्डकी गाउँपालिका भूगोलको हिसाबले टाढा रहेकाले छुट्टै व्यवस्थाको माग राख्ने क्रममा आवेगमा आएर प्रशासन कार्यालयको स्क्यानर फुटाएको प्रहरीसमक्ष स्वीकारेका थिए । थापालाई जिल्ला प्रहरी कार्यालय गुल्मीले केहीबेर नियन्त्रणमा लिएर सहमती पछि छाडेको हो ।

उनलाई लिखित रुपमा माफी मगाएर र क्षति भएको स्क्यानर मेसिन किनिदिने सहमत गराएर बिहीबार बेलुकी नै छोडिएको जिल्ला प्रहरी कार्यालय गुल्मीका प्रहरी नायब उपरीक्षक शंकर पोखरेलले बताए ।

जिल्ला प्रशासन कार्यालयमा एउटा स्टेसनबाट राहदानीको आवेदन लिने काम हुँदै आएको छ । जसको क्षमता ४० जनासम्मको छ । पछिल्ला केही वर्षयता राहदानी लिनेको संख्या बढेपछि प्रशासनले टोकन प्रणाली र कार्यालय बाहेकको समयमा समेत सेवा दिने गरेको छ । तर पनि सेवाग्राहीको भीड घटेको छैन ।

कालिगण्डकी गाउँपालिका विकट भएकाले त्यहाँका बासिन्दालाई प्राथमिकता दिनुपर्ने माग गाउँपालिका अध्यक्ष थापामगरले राखेका थिए । त्यही विषयमा छलफल भइरहेका बेला उनी आवेगमा आएर स्क्यानर मेसिन नै फुटाइदिएका थिए ।