अबदेखि कार्यालय समयमा नभेटिने चिकित्सकमाथि कारबाही हुने, मन्त्रीले जारी गर्न लगाए सर्कुलर

५ पुष, काठमाडौं । स्वास्थ्यमन्त्री प्रदीप पौडेलले कार्यलय समयभित्र काममा नभटिने चिकित्सकमाथि तत्काल कारवाही गर्ने नीति बनाएका छन् । उनले मन्त्रालयमार्फत सबै तहमा सर्कुलर जारी गर्न लगाएका छन् । मन्त्रीको निर्देशनपछि चिकित्सकहरु समयमा कार्यालय नभएको पाइए कारबाही गर्ने जानकारी स्वास्थ्य मन्त्रालयले सबै निकायमा पठाएको छ । 

मन्त्रालयले स्थापना गरेको गुनासो सुनुवाइ एकाई ‘हेल्लो स्वास्थ्य १११५’ मा कार्यालय समयमा चिकित्सक उपलब्ध नभएको गुनासो आएको मन्त्रीले यस्तो नीति बनाएका हुन् । अटेर गरेको पाइए कारबाही गर्न स्वास्थ्य तथा जनसंख्यामन्त्री प्रदीप पौडेलले मातहतका अधिकारीहरुलाई निर्देशन दिएका छन् । उनले यसअघि नै व्यवस्था गर्न भनिएको विद्युतीय हाजिरी अनिवार्य गर्ने व्यवस्था मिलाउन समेत अधिकारीहरुलाई भनेका थिए । 

मन्त्री पौडेलले नियमित रुपमा हेल्लो स्वास्थ्यमा आएका गुनासो सुन्दै सुधारका लागि अधिकारीहरुको ध्यानाकर्षण गराउँदै आएका छन् । यसलगत्तै मन्त्रालयले मातहतका सबै अस्पतालमा पत्राचार गर्दै कार्यालय समयमा सेवा प्रवाह गरेको सुनिश्चितता गर्न भनेको छ । मन्त्रालय अन्तर्गत गुणस्तर मापन तथा नियन्त्रण महाशाखाले मातहतका सबै कार्यालयमा पठाएको पत्रमा चिकित्सक एवं स्वास्थ्यकर्मीहरु कार्यालय समयमा कार्यकक्षमा रही सेवा प्रवाहको व्यवस्था मिलाउन भनिएको छ । 

कार्यालय समयमा बाहिर जानु परे लगबुक राखेर मात्र जाने व्यवस्था मिलाउन पत्रमा भनिएको छ । मन्त्रालयले कार्यालयमा आउँदा र जाँदा अनिवार्य रुपमा विद्युतीय हाजिरी गर्ने व्यवस्था मिलाउन समेत पत्रमा भनेको छ । मन्त्रालयका प्रवक्ता डा. प्रकाश बुढाथोकीले कार्यालय समयमा चिकित्सक तथा स्वास्थ्यकर्मी नभएको बारम्बारको गुनासोपछि पत्राचार गरिएको भन्दै अनुगमन पनि गर्ने जानकारी दिएका छन् ।