एडीबीले अनुदान र सहुलियतपूर्ण ऋण गरी तीन परियोजनाका लागि १ खर्ब साढे ५ अर्ब सहयोग गर्ने

५ पुस, काठमाडौँ । एसियाली विकास बैंक (एडीबी) ले नेपाल सरकारलाई विभिन्न तीन परियोजना कार्यान्वयन गर्न  १ खर्ब ५ अर्ब ६१ करोड रकम सहयोग गर्ने भएको छ । यो रकममध्ये ६ अर्ब ५२ करोड अनुदान र अरु सहुलियतपूर्ण ऋण भएको अर्थ मन्त्रालयले जनाएको छ । 

शुक्रबार अर्थ मन्त्रालयमा आयोजित कार्यक्रममा ऋण एवं अनुदान सहायता सम्बन्धी सम्झौतापत्रमा हस्ताक्षर भएको छ ।  अर्थसचिव डा रामप्रसाद घिमिरे र एडीबीका देशीय निर्देशक आर्नो कोश्वाले हस्ताक्षर गरेका हुन् । सचिव घिमिरेले नेपालको समाजिक आर्थिक विकासमा एडीबीबाट प्राप्त सहयोगले विकासमा सघाउने बताए । 

दोस्रो चरणको काठमाडौँ उपत्यका खानेपानी आपूर्ति सुधार परियोजना, दक्षिण एसिया उपक्षेत्रीय आर्थिक सहयोग (सासेक) विद्युत् प्रसारण तथा वितरण सुदृढीकरण परियोजना तथा समावेशी विकास कार्यक्रम कार्यान्वयन गर्न उक्त ऋण एवं अनुदान उपयोग गरिनेछ ।