गाजामा २० लाखभन्दा बढी मानिस फसेका :संयुक्त राष्ट्रसंघ

६ पुस, काठमाडौं । गाजामा २० लाख भन्दा बढी मानिसहरू फसेका संयुक्त राष्ट्र संघको राहत र कार्य एजेन्सी 'युएनआरडब्लुए' का आपतकालीन अधिकारी लुइस वाटरिजले शुक्रबार बताए ।

युएनआरडब्लुएले हालैका दिनहरूमा गाजामा खराब मौसम अवस्था जारी रहने अपेक्षा गरेको छ । यसका बाबजुद पनि एजेन्सीलाई आश्रय सहायताभन्दा खानालाई प्राथमिकता दिन बाध्य पारिएको छ ।

यसैबीच, संयुक्त राष्ट्र संघको अन्तर्राष्ट्रिय बाल आपतकालीन कोष 'युनिसेफ' ले गाजाका बालबालिकामा जारी सङ्कटको असरप्रति गहिरो चिन्ता व्यक्त गरेको छ ।

गाजामा युनिसेफका प्रमुख सञ्चार अधिकारी रोसालिया बोलिनले बालबालिकाको एउटा पुस्ताले आफ्नो अधिकारको गम्भीर उल्लङ्घन र आफ्नो भविष्यको विनाशको पीडा भोगिरहेको कुरा प्रकाश पारे ।

चौध महिनाभन्दा बढी समयदेखि बालबालिका विपद्को छेउमा बाँचिरहेका छन्, जसमा १४ हजार ५०० भन्दा बढी बालबालिकाको मृत्यु भएको र हजारौं घाइते भएका छन् ।

युनिसेफले पनि जाडो सुरु हुने बित्तिकै स्थिति खराब हुने चेतावनी दिएको छ । गाजाका बालबालिकाहरू चिसोको सामना गरिरहेका छन् । धेरैले अझै गर्मीको लुगा लगाएर खाली खुट्टा हिंडिरहेका छन् ।