लिगमा ८ टिम सहभागी थिए, २२ दिनमा ३२ खेल भए

७ पुष, काठमाडौं । गत मंसिर १५ देखि सुरु भएको नेपाल प्रिमियर लिग (एनपीएल) खेल पुष ६ गते समापन भयो । फ्रेन्चाइज क्रिकेट प्रतियोगिताको उद्घाटन खेलमा जनकपुर बोट्ल्स र विराटनगर किङ्सबीच प्रतिस्पर्धा भएको थियो । खेल सुरु गरेको जनकपुरे प्रतियोगिता पनि जित्यो । उपाधि जनकपुर बोल्ट्सले जितेपछि मधेसमा हर्षोल्लास छाएको छ । 

मधेस प्रदेशको राजधानी जनकपुरधाम लगायत मधेसका विभिन्न सहरमा समर्थकहरू नाचगान र आतसबाजी भइरहेका छन् । सडक, चोक र गल्लीमा भेला भएर खुसी साटासाट गरिरहेका छन् । पहिलो संस्करणको लिग जनकपुरले जितेपछ पर्साको प्रसौनी गाउँपालिकाले आज आइतबार विदासमेत दिएको छ ।

गाउँपालिका अध्यक्ष जसवन्त यादवले सूचना जारी गर्दै मधेस प्रदेशको प्रतिनिधित्व गर्दै जनकपुर बोल्ट्सले एनपिएल उपाधि जितेको ऐतिहासिक अवसरमा गाउँपालिकाभरि आइतबार बिदा दिइएको जानकारी दिएका छन् । शनिबार बसेको गाउँ कार्यपालिकाको बैठकले आइतबार सबै वडा कार्यालय, शैक्षिक संस्था, बैंक तथा वित्तीय संस्था, सबै स्वास्थ्य चौकीमा अति आवश्यक सेवाबाहेक आइतबार एक दिनको स्थानीय विदा दिने निर्णय गरेको थियो ।

शनिबारको अन्तिम खेलमा एनपीएलको पहिलो संस्करणको च्याम्पियन जनकपुर बोल्ट्स भएको हो ।  कीर्तिपुरस्थित त्रिवि क्रिकेट मैदानमा भएको फाइनलमा सुदूरपश्चिम रोयल्सलाई ५ विकेटले पराजित गर्दै जनकपुरले उपाधि हात पारेको हो । जनकपुरले ट्रफीसहित १ करोड १० लाख रुपैयाँ पुरस्कार हात पारेको छ । नेपाली खेलकुदमा प्रदान गरिएको यो सबैभन्दा ठूलो पुरस्कार रकम हो । उपविजेता सुदूरपश्चिमले ५१ लाख पाएको छ ।

आठ फ्रेन्चाइज टिम सहभागी प्रतियोगितामा तेस्रो भएर कर्णाली याक्सले २५ लाख र चौथो चितवन राइनोजले १५ लाख रुपैयाँ पाए । २२ दिन चलेको एनपीएलमा ३२ खेल भएका थिए । सुदूरपश्चिमका कप्तान दीपेन्द्रसिंह ऐरीले ‘इलेक्ट्रिफाइङ प्लेयर अफ द टुर्नामेन्ट’ हुँदै पुरस्कारका रूपमा कार प्राप्त गरे । प्रतियोगिताभरमा सर्वाधिक १७ विकेट लिएका जनकपुर बोल्ट्सका ललित राजवंशीले उत्कृष्ट बलर घोषित हुँदै मोटरसाइकल पुरस्कार हात पारे ।
 
सुदूरपश्चिमले यसै एनपीएलमा जनकपुरलाई दुई पटक पराजित गरेको थियो । राउन्ड रोबिन लिग खेलमा सुदूरपश्चिमले जनकपुरमाथि ७२ रनको विजय हात पारेको थियो । सुदूरलाई १२३–९ को स्कोरमा रोके पनि जवाफमा आएको जनकपुर १२.१ ओभरमा ५१ रनमै अलआउट भएको थियो । यो एनपीएलकै न्यून स्कोरमा रह्यो । 

सुदूरपश्चिमले जनकपुरलाई नै क्वालिफायर–१ मा ८ विकेटले हराएर फाइनल पुगेको थियो । जनकपुरले क्वालिफायर–२ मा कर्णाली याक्समाथि २ विकेटको विजय हात पार्दै सुदूरपश्चिमसँगको फाइनल भेट पक्का गरेको थियो । हातमा चोट बोकेका कप्तान अनिल साहबिनै जनकपुरले यो सफलता पाएको हो । फाइनल खेल हुनु अघि सुदूपश्चिमका समर्थकले जनपुरका खेलाडीलाई धोती शब्द प्रयोग गरेपछि जनकपुका खेलाडीले मन दुखाएका थिए ।