जिल्ला अदालत कास्कीमा रवि र छबीसहितका आरोपीविरुद्ध ४५० पेज लामो अभियोग पत्र दर्ता

७ पुष, पोखरा । सरकारी वकिल कार्यालयले सहकारी प्रकरणमा पक्राउ परेका रवि लामिछानेसहितका आरोपी विरुद्ध जिल्ला अदालतमा अभियोग पत्र पेश गरेको छ । अहिले जिल्ला अदालतमा त्यसलाई रुजु गर्ने काम भइरहेको  जिल्ला न्यायाधिवक्ता कमला काफ्लेले जानकारी दिइन् । 

जिल्ला प्रहरी कार्यालय कास्कीले यही पुस १ गते सरकारी वकिलको कार्यालयमा अनुसन्धान प्रतिवेदन बुझाएको थियो । सो प्रतिवेदनमा रविसहित जीवी राई लगायतलाई करिब एक अर्ब विगो माग दावी गर्नुपर्ने राय छ । सोही आधारमा गोर्खा मिडिया प्रालिका अध्यक्ष गितेन्द्र बाबु (जीबी) राईसहित १९ जनाविरुद्ध पुस ५ गते मुद्दा दर्ता भएको थियो ।

यसअघि लामिछानेलाई जिल्ला अदालत कास्कीमा उपस्थित गराइएको थियो । मुद्दा दर्ता गर्न उनलाई अदालत लगिएको हो । यसअघि थपेको उनको म्याद पनि सकिएको थियो । उनी विरुद्ध सहकारी ठगी, संगठित अपराध र सम्पत्ति शुद्धीकरण कसुरमा अभियोग पत्र दर्ता गर्न जिल्ला सरकारी वकिलको कार्यालयले उनलाई अदालत उपस्थित गराएको हो । 

अहिले कास्की जिल्ला अदालत परिसरमा सुरक्षाकर्मीहरु बढाइएको छ ।  सो प्रकरणमा गत असोज ६ गते पक्राउ परेका छविलाल जोशी हिरासतमा रहेको गत शुक्रबार नै ९० दिन पुगिसकेको छ । रवि भने गत कात्तिक २ देखि प्रहरीको हिरासतमा छन् ।