नेपाल एयरलाइन्सको जहाजमा अचेत भेटिएका देउमान लिम्बुलाई अस्पतालले मृत घोषणा गर्यो

७ पुस, काठमाडौं । केएमसी अस्पतालले नेपाल वायुसेवा निगमको जहाजमा हङकङबाट नेपाल आउने क्रममा बाटोमै अचेत भएका ताप्लेजुङका देउमान लिम्बुलाई मृत घोषित गरेको छ । जहाजका कर्मचारीले उनी अचेत भएको खबर आफन्तलाई दिएपछि नजिकैको केएमसी अस्पताल पुर्याएको थियो । तर, उनलाई  अस्पताल पुर्‍याएसँगै मृत घोषणा गरियो । 

एयरलाइन्स कर्मचारीका अनुसार निगमको आरए ४१० उडानमार्फत् हङकङबाट काठमाडौं आउने क्रममा उनी जहाजभित्रै अचेत भएका थिए । काठमाडौं आइ पुगेपछि लिम्बुलाई एयरलाइन्सका कर्मचारीले आफन्तको जिम्मा लगाएका थिए । जहाजभित्र अचेत अवस्थामा भेटिएका उनलाई आफन्तहरू रिसिभ गर्न विमानस्थलमै आएका थिए । 

जहाजमा अचेत अवस्थामा रहेका यात्रुको अवस्था के थियो भन्न नसकिने भएकाले विमानस्थलको आकस्मिक सेवा हेर्ने केएमसी अस्पतालमा पठाइएको थियो । उनी कति बेलादेखि अचेत थिए भन्ने खुलेको छैन् । देउमानबारे नेपाल एयरलाइन्स र विमानस्थलले थप केही जानकारी दिएको छ । मृतक देउमान ५३ वर्षका थिए ।