अदालत उपस्थित भइन भैँसेपाटी हनी ट्रयाप प्रकरणकी मुख्य नाइके प्रहरी निरीक्षक शाही

७ पुष, काठमाडौं । ललितपुरको भैँसेपाटी हनी ट्र्याप प्रकरणकी मूख्य नाइके प्रहरी निरीक्षक (इन्सपेक्टर) बिनुकुमारी शाही अदालत उपस्थित भएकी छन् । उनी आइतबार ललितपुर जिल्ला अदालतमा हाजिर भएकी हुन् । भैँसेपाटीमा घरजग्गा कारोबारीलाई हनिट्रयापमा पारेर रकम असुलेको घटनामा उनलाई प्रतिवादी कायम गरेर प्रहरीको केन्द्रीय अनुसन्धान ब्यूरोले मुद्दा दायर गरेको थियो ।

व्यवसायीलाई बलात्कार मुद्दामा फसाइदिने भन्दै हनिट्रयापमा पारेर रकम असुलेको आरोपमा भैँसेपाटी प्रभागमा कार्यरत सहायक हवल्दार महेन्द्र हमाल, सुस्मा बिक र इटहरी घर भएका ताज मूल इस्लाम र भिमादेवी थापा पक्राउ परेका थिए । घरजग्गा कारोबारीबाट सो समूहले ३० लाख असुलेको प्रहरीको अनुसन्धानबाट खुलेको छ  । 

दुई पटकमा २० लाख नगद भिमादेवी थापाको खातामा जम्मा भएको प्रहरीको अनुसन्धानबाट खुलेको छ । आफूसँग रकम असुल्न प्रहरी प्रभाग भैँसेपाटीकी इन्स्पेक्टर बिनु शाही पनि मिलेको ती व्यवसायीले आरोप लगाएका छन् । यसअघि गृह मन्त्रालयले शाहीलाई निलम्बन गर्ने निर्णय गरेको थियो । जिल्ला न्यायाधीश रीताकुमारी बखरेलको इजलासमा शाहीको बयान सुरु गरिएको जिल्ला अदालत ललितपुरका प्रवक्ता राम सजिवन महतोले नेपालबसहलाई जानकार दिए ।  

२०८१ असोज ७ गते दिउँसो १२ः३० बजे जाहेरवालालाई नै पक्राउ गरेर भैँसेपाटी प्रभागको हिरासतमा राखिएको र हिरासतमा राखेको १३ मिनेट ३४ सेकेन्डपछि बाहिर निकालिएको फुटेज फेला परेको थियो । प्रहरीकै संलग्नतामा भैँसेपाटी प्रभागमा एक व्यवसायीलाई झुटो आरोप लगाएर थुनामा राखिएको र रकम बार्गेनिङ गरेर छाडिएको अभियोग छ ।