कैलालीबाट आधा किलो सुनसहित दुई भारतीय पक्राउ

७ पुष, धनगढी । प्रहरीले कैलालीमा आधा किलो सुनसहित दुई भारतीय नागरिक पक्राउ गरेको छ । ५४९.२०० ग्राम सुन, नगद र अन्य सामग्रीसहित भारतको पलियाका ४४ वर्षीय दीपक गुप्ता र  ३४ वर्षीय सुमित बर्मालाई नियन्त्रणमा लिएको जिल्ला प्रहरी कार्यालय कैलालीले जनाएको छ ।

धनगढी ३ को ट्राफिक चौराहमा शंका लागेपछि चेकजाँच गर्दा युपी ३२ जेभी ९२०० नम्बरको मोटरसाइकलबाट सुन ल्यापटप,  मोबाइल, ४४ हजार ८१० नेपाली रुपैयाँ र  १ हजार २८० भारतीय रुपैयाँ बरामद गरिएको जिल्ला प्रहरी कार्यालय कैलालीका प्रहरी निरीक्षक दर्शन खड्काले जानकारी दिए ।

पक्राउ परेका मध्येका सुमित बर्माले भारतको पलियामा सुनचाँदीको व्यवसाय गर्दै आएको खुलेको छ । पक्राउ परेका दुवै जनामाथि अनुसन्धान भइरहेको र घटनाको थप विवरण संकलन भइरहेको प्रहरीले जनाएको छ ।