पोखरा र संस्कृत विश्वविद्यालयमा उपकुलपति नियुक्त, कान्तिको अध्यक्षमा सुवेदी मनोनीत

७ पुष, काठमाडौं । सरकारले कान्ति बाल अस्पताल विकास समितिको अध्यक्षमा कास्कीका श्रीराम सुवेदीलाई मनोनयन गरेको छ । शुक्रवार बसेको मन्त्रिपरिषद् बैठकले विकास समितिको अध्यक्षमा सुवेदीको मनोनयनसहित १९ वटा निर्णय गरेको हो । 
 
सञ्चार तथा सूचना प्रविधि मन्त्री पृथ्वी सुब्बा गुरुङले आइतबार मन्त्रालयमा नियमित पत्रकार सम्मेलनमार्फत मन्त्रिपरिषद् बैठकका निर्णय सार्वजनिक गरेका हुन् । यस्तै पोखरा विश्वविद्यालयको उपकुलपतिमा प्राडा बेदराज केसी नियुक्त भएका छन् । प्रधानमन्त्री तथा विश्वविद्यालयका कुलपति केपी शर्मा ओलीले केसीलाई उपकुलपति नियुक्त गरेका हुन् ।
 
नेकपा एमाले निकट नेपाल प्रगतिशिल प्राध्यापक संगठनका अध्यक्ष समेत रहेका केसीलाई उपकुलपतिको जिम्मेवारी दिइएको हो । उनी पहिलो नम्बरमा सिफारिसमा परेका थिए । उपकुलपतिका लागि १५ जनाको आवेदन परेको थियो । तीमध्ये १२ जनाको आवेदन स्वीकृत भएको थियो । 

त्यस्तै नेपाल संस्कृत विश्वविद्यालयमा प्राडा धनेश्वर नेपाल नियुक्त भएका छन् । नेपाल संस्कृत विश्वविद्यालयका लागि १३ जनाको नाम स्वीकृत भएको थियो । सरकारले सवारी साधन खरिद गर्न कर्जा प्रवाह गर्ने व्यवसायी र सामाजिक सुरक्षा कोषको लागि नेपाल राष्ट्र बैंक, सवारी साधन बिक्री गर्ने व्यवसायीको लागि यातायात व्यवस्था विभाग र इन्भेस्टमेन्ट कम्पनीको लागि नेपाल धितो पत्र बोर्डलाई सम्पत्ति शुद्धीकरण निवारणका लागि नियमनकारी निकाय तोक्ने निर्णय पनि गरेको छ ।