भक्तपुरको बालकोटमा डेरागरी बस्ने बाबुसहित एक छोरा मृत भेटिए, अर्को छोरा बेपत्ता

८ पुष, काठमाडौं । भक्तपुरको बालकोटमा खोटाङ घर भएका कुलप्रसाद आचार्य र उनका २२ वर्षका छोरा प्रविन आचार्य मृत फेला परेका छन् । उनीहरुको हत्या भएको आशंका गरिएको छ । सँगै बस्ने जेठा छोरा भने बेपत्ता रहेको प्रहरीले जनाएको छ । 

जिल्ला प्रहरी परिसर भक्तपुरका प्रमुख एसपी माधव बुढाथोकीका अनुसार खोटाङको दिक्तेल रुपाकोट मझुवागढी नगरपालिका घर भई बालकोट बस्दै आएका ५६ वर्षका कूलप्रसाद आचार्य र उनका २२ वर्षका छोरा प्रविन आचार्य मृत फेला परेका हुन् । बाहिरबाट चाबी लगाएको अवस्थामा कोठाभित्रै सोमबार बिहान उनीहरुको शव फेला परेको हो ।

मृतक दुवैको शरीरमा चोट देखिएको छ । अहिले भक्तपुर प्रहरी परिसरको टोली घटनास्थलमा पुगेर अनुसन्धान सुरु गरिरहेको जानकारी दिइएको छ । बेपत्ता रहेका जेठा छोराको खोजी भइरहेको प्रहरीले जनाएको छ ।