पत्नी सहकारीमा जोडिएपछि राजीनामाको दवावमा परे लेखा समिति सभापति ऋषिकेश पाखेरेल

८ पुष, काठमाडौं । सहकारी प्रकरणले गर्दा लेखा समिति सभापति ऋषिकेश पोखरेलमाथि पद छोड्न दवाव बढेको छ । प्रतिपक्षी दलले मात्र नभई उनकै पार्टीका सांसदले पनि उनलाई पदबाट राजीनामा दिनुपर्ने आवाज उठाउन थालेका छन् । नेकपा एमालेका सांसद योगेश भट्टराईले लेखा समिति सभापतिले जवाफ दिनुपर्ने बताएका छन् । सोमबार बसेको समितिको बैठकमा उनले सभापति ऋषिकेश पोखरेलले जवाफ दिनुपर्ने बताएका हुन् । 

नेकपा माओवादी केन्द्रले पनि लेखा समिति सभापतिको राजीनामा मागेको छ । सोमबार समिति बैठकमा माओवादी केन्द्रका सांसद अमनलाल मोदीले सभापति ऋषिकेश पोखरेलको राजीनामा माग गरे । सहकारीमा परिवार जोडिएको र लेखा समितिको सभापति प्रमुख प्रतिपक्षले पाउनु पर्ने भन्दै माओवादीले उनको राजीनामा माग गरेको हो । बैठकमा मोदीले भने,‘सभापतिज्यू माथि प्रश्न छ । सहकारीको विषय तपाईंको परिवारमा जोडिएको छ । प्रश्न उठेपछि यसको बारेमा तपाईंले जवाफ दिनुपर्छ ।’

सभापति पोखरेलकी पत्नी अञ्जला कोइरालासहित २६ जनाविरुद्ध मोरङको धनपालथान गाउँपालिका–३ स्थित उमागौरी कृषि सहकारी संस्थाको रकम अपचलनमा संलग्न आरोपमा मुद्दा दायर गरिएको छ । लेखा समितिको बैठक धेरै समय पछि बसेको हो । चेक एण्ड ब्यालेन्सको कुरा गर्दा लेखा समितिले हेर्छ । तर, तपाईंको पार्टी सरकारमा छ । लेखा समिति सरकारको छाया बन्ने हो । सारमा यसको बारेमा पुनःबिचार गर्दा राम्रो,उनले भने । 

एमालेका सांसद भट्टराईले सभापतिको श्रीमती जोडिए किन सभापतिलाई पनि जोड्ने भन्दै प्रश्न पनि गरेका छन् । सभापतिको श्रीमती सहकारीमा जोडिएको भन्दै उनले पोखरेललाई जोड्न आवश्यक नरहेको बताए । भट्टराईले एमालेका इमान्दार सदस्यले बाहिर चिच्याउनु कराउनु भन्दा पनि अदालत जानेमा विश्वास व्यक्त गरे ।

यता, समितिका सभापति पोखरेलले भने आफू जुनसुकै परीक्षामा बस्न तयार रहेको बताएका छन् । सोमबार बसेको समितिको बैठकमा सांसदहरूले उठाएका प्रश्नको जवाफ दिँदै उनले आफू कानुनमा विश्वास गर्ने बताए ।