बाबु र भाइको हत्या आफूले नै गरेको भन्दै मिलनले गरे आत्मसमर्पण, घटना सार्वजनिक गर्दै प्रहरी

९ पुस, काठमाडौं । भक्तपुरको सूर्यविनायक नगरपालिका–२ बालकोटमा बाबुछोरा मृत भेटिएको प्रकरणमा प्रहरीले उनका जेठा छोरालाई नियन्त्रणमा लिएको छ । उनले नै हत्या गरेको पुष्टि भएको प्रहरीले जनाएको छ । प्रहरीका अनुसार बुवा र भाइको हत्या आफूले गरेको भन्दै कुलप्रसादका जेठा छोरा मिलन आचार्य  प्रहरीमा आत्मसमर्पण गर्न पुगेका थिए । यसपछि उनलाई नियन्त्रणमा लिएर अनुसन्धान सुरु गरिएको हो । 

मिलनले प्रहरी वृत्त महराजगञ्जमा आत्मसमर्पण गरेको प्रहरीले जनाएको छ । सोमबार खोटाङको रुपाकोट मझुवागढी नगरपालिका–१ घर भएका ५६ वर्षीय कुल प्रसाद आचार्य र कान्छो छोरा २२ वर्षका प्रबिन आचार्य मृत भेटिएका थिए । जेठा छोरा मिलन फरार थिए । कुल प्रसादको टाउको पछाडि र कानमा चोट देखिएको छ । प्रहरीमा आत्मसमर्पण गर्दै मिलनले भाइ र बुवालाई आफूले नै हत्या गरेको दावी गरेका छन् । 

भक्तपुरमा छोरासहित मृत फेला परेका कुलप्रसाद आचार्य जिल्ला हुलाक कार्यालय खोटाङको निमित्त कार्यालय प्रमुख थिए । दिक्तेल रुपाकोट मझुवागढी नगरपालिका–१ दिक्तेल निवासी ५६ वर्षीय निमित्त कार्यालय प्रमुख आचार्य भक्तपुरको सूर्यविनायक नगरपालिका–२ बालकोटस्थित छोराहरु बसेको भाडाको घरमा विदा मनाउन आएका थिए ।  

हुलाकका निमित्त कार्यालय प्रमुख आचार्य खोटाङबाट पाँच दिनअघि मात्रै जेठा छोरा मिलन आचार्य र कान्छा छोरा प्रवीण बसिरहेको भक्तपुरस्थित बालकोटमा रहेको भाडाको घरमा पुगेका थिए । बाहिरबाट चाबी लगाएको कोठाभित्र आचार्य बाबुछोरा हत्या गरेको अवस्थामा मृत फेला परेका थिए ।  जेठा छोरा सम्पर्कविहीन हुनुमा घटना शंकास्पद बनेको प्रहरीले बताएको थियो ।