संघीय संसदको राज्य व्यवस्था समिति सदस्यबाट पनि हटाइए रवि लामिछाने

९ पुस, काठमाडौं । प्रतिनिधिसभा अन्तर्गतको राज्य व्यवस्था तथा सुशासन समिति सदस्यबाट राष्ट्रिय स्वतन्त्र पार्टी (रास्वपा) का सभापति रवि लामिछानेलाई  हटाइएको छ । प्रतिनिधिसभा सदस्यबाट निलम्बन भएका उनको यो पद पनि निलम्बन भएको हो । 

मंगलबारको बैठकमा समिति सभापति रामहरी खतिवडाले सांसद पदबाट निलम्बित भएसँगै रवि लामिछानेको राज्य व्यवस्था समिति सदस्य समेत निलम्बित भएको जानकारी दिए । सहकारी ठगीका साथै संगठित अपराध र सम्पत्ति शुद्धीकरणमा पनि मुद्दा दर्ता भएपछि संघीय संसद सचिवालयले सोमबार लामिछानेलाई प्रतिनिधिसभा सदस्यबाट निलम्बन गरेको थियो ।

लामिछाने प्रतिनिधिसभा सदस्यबाट निलम्बनमा परेसँगै राज्य व्यवस्था समितिको सदस्य समेत नरहेको राज्य व्यवस्था समिति सभापति खतिवडाले जानकारी दिए । यसअघि लामिछाने राज्य व्यवस्था समितिमा सदस्य थिए । उनीमाथि कास्की जिल्ला अदालतमा मुद्दा चलिरहेको छ ।