१४ अंकले बढेर २६२६ विन्दुमा रोकियो नेप्से, सोमबार भन्दा ७७ करोड बढी भयो कारोबार

९ पुस, काठमाडौं । मंगलबार नेप्से परिसूचक दोहोरो अंकले बढेको छ । नेप्से १४.११ अंकले बढेर २६२६.३१ विन्दुमा बन्द भएको छ । यसदिन नेप्से परिसूचकसँगै कारोबार रकम पनि बढेको छ । गत कारोबार दिन अर्थात् सोमबार ४ अर्ब ४३ करोडको शेयर कारोबार भएकोमा मंगलबार ५ अर्ब २० करोडको शेयर कारोबार भएको छ । 

अघिल्लो दिनको तुलनामा कारोबार रकममा ७७ करोड रूपैयाँ वृद्धि भएको हो । आज ३१२ वटा धितोपत्रको एक करोड २७ लाख ४६ हजार ४१० कित्ता शेयर किनबेच भएको हो । आज आत्मनिर्भर लघुवित्त, गुराँस लघुवित्त, सामुदायिक लघुवित्तको मूल्य १० प्रतिशत बढ्यो ।

न्यादी हाइड्रोपावरको ८.६, सप्तकोशी विकास बैंकको ७.५ प्रतिशत बढ्यो । सपोर्ट माइक्रोफाइनान्सको १०, जानाकी फाइनान्सको ८ तथा युनिलिभर नेपालको ७.२ प्रतिशत मूल्य घट्यो । कारोबार रकमका आधारमा जानाकी फाइनान्स, जोशी हाइड्रोपावर, नेपाल फाइनान्स, माउन्टेन इनर्जी नेपाल र न्यादी हाइड्रोपावर क्रमशः अगाडि रहे ।

उत्पादन समूह २.३२ प्रतिशत तथा व्यापार ०.४५ प्रतिशत घटे । तिबाहेक सबै सेक्टरका सूचक बढेका छन् । विकास बैंक सबैभन्दा धेरै १.७५ प्रतिशत बढ्यो । बैंकिङ ०.७६, फाइनान्स १.६२, होटल तथा पर्यटन ०.९४, हाइड्रोपावर ०.७१, लगानी ०.९६, जीवन बीमा ०.२८, माइक्रोफाइनान्स ०.९५, निर्जीवन बीमा ०.५६ र अन्य ०.४९ प्रतिशत बढे ।