सशस्त्र प्रहरी मोरङका एसपी तानिए, डीआईजी सुवेदी कहिले ?

९ पुस, काठमाडौं । तस्करलाई सघाएको आरोपमा मोरङको सशस्त्र प्रहरी प्रमुख एसपी विश्व खड्कामाथि दोस्रो पटक आन्तरिक छानबिन सुरु भएको छ । उनलाई सशस्त्र प्रहरी मुख्यालय बोलाएर मंगलबारबाट दोस्रो पटक छानबिन शुरु गरिएको हो । यसमा बराह बाहिनीका डीआईजीलाई भने चोख्याउन खोजिएको छ । मोरङमा २०८० फागुन पहिलो साता सशस्त्र प्रहरीको प्रमुखको रूपमा गएका एसपी खड्कामाथि तस्करीको लाइन चलाएको आरोप लाग्दै आएको छ ।‘सीमा क्षेत्रमा तस्करीको लाइन खुलाइएको देखियो यो सह्य छैन’, सशस्त्र प्रहरी मुख्यालयका एक अधिकृतले भने ।  

बराह बाहिनीका डीआईजी शम्भू सुवेदीकै निर्देशनमा लाइन खुलाइएको भन्दै एसपी खड्काले आफूनिकट सहकर्मीलाई बताउने गरेका भएपनि डीआईजी भने जोगिएको चर्चा मोरङमा चलेको छ । मोरङमा तीन दर्जन सीमा नाका छन् । जसमध्ये विराटनगरसहित पूर्वी क्षेत्रको नाकाबाट तस्करीको लाइन चलाएर अवैध असुली गरेको उनीमाथि आरोप छ । विराटनगरका व्यापारी विनोद केशरीलाई लाइन चलाउन दिएको मुख्यालयको आरोप छ । एसपी खड्काको बारेमा अहिले मुख्यालयमा एक दर्जन उजुरी परेको स्रोतको दावी छ । आईजीपी राजु अर्यालकै निर्देशनमा खड्कालाई काठमाडौँ तानेर आवश्यक छानबिन एवं अनुसन्धानको प्रक्रिया अघि बढाइएको छ ।

यसअघि खड्कामाथि लागेको आरोपको छानबिन एवं अनुसन्धान गर्न डीआईजी लक्ष्मणबहादुर सिंहको नेतृत्वमा तीन सदस्य छानबिन समिति गठन भएको थियो । समितिमा एसपी माधव रेग्मी र डीएसपी भुवन भण्डारी सदस्य थिए  । गठित समितिका सदस्य एसपी रेग्मी मोरङ पुगेर घटनाको अनुसन्धान सुरु गरेका थिए  । त्यतिबेला उनलाई चेतावनीसहित छाडिएको थियो । ‘यो दोस्रो पटक हो अब उनी कमाण्डमा फिर्ता हुने संभावना निकै कमजोर छ’, स्रोतले भन्यो ।

सशस्त्रको मिलेमतोमा गाईगोरु, मटर, चिनियाँ स्याउ, सुपारीलगायत नेपालबाट भारततर्फ तस्करी हुने गरेको आरोप छ । भारतबाट धान, गहुँ लगायतका खाद्यान्नका परिकार, किराना सामान, लत्ताकपडा, गाडीका पार्टपुर्जा, हार्डवेयरका सामानलगायत भन्सार छली गरेर नेपाल भित्रिने गरेको छ । सशस्त्र प्रहरीले एसपीहरूलाई पठाउँदा नै राजश्व चुहावट र सीमा क्षेत्रको तस्करी नियन्त्रण गर्ने प्रमुख दायित्व दिएर पठाउँछ । आईजीपी अर्यालले गल्ती भेटिएमा कसैलाई पनि नछाड्ने बताइरहँदा अहिलेसम्म समय अवधि नपुगी किसान कर्माचार्य, दर्शन गिरीलगायतका एसपीहरू कारवाही स्वरूप तानिएका छन् ।

प्रहरीले कुनै पनि सामान समाएपछि छोड्नका लागि अदालतमा वा सम्बन्धित निकायमा बुझाउनु पर्छ । मोरङमा भारतसँग सीमा जोडिएको ५२ किलोमिटर छ । ५२ किलोमिटरमा तीन दर्जन बढी सीमा नाका छ । तस्करीको लाइन सबैभन्दा बढी विराटनगरको दक्षिण क्षेत्र मटिअर्वा, दक्षिण गेट, दरैया नाका पर्दछ । यसैगरी पूर्वमा रंगेली नगरपालिकाको धनापट्टी, रतुवामाई नगरपालिको सिक्टी, आमतोला, धनपालथान गाउँपालिका दक्षिण क्षेत्रको मायागञ्ज र खैरबना नाकादेखि खाद्यवस्तु तस्करी हुने गरेको पाइएको हो । केही दिन अघि मात्रै नोचा बिओपीका इन्चार्ज पनि तानिएका थिए ।

नोचाबाट बिहान २ देखि ३ बजे र रातिको ११ देखि १२ बजेको समयमा तस्करीमा लागेका भरियालाई निश्चित रकम दिएर एउटा मोटरसाइकल र अटोमा सामान ओसार्ने दिइएको आरोप छ । यस्ता भरियाले मोरङको उत्तरी क्षेत्र उर्लाबारी, मधुमल्ला, पथरीदेखि झापाका दमकसम्मका होलसेल पसलमा कपडा र खाद्यवस्तु पुर्याइदिने गरेका छन् ।