पहिरोले क्षति पुर्याएको माथिल्लो तामाकोशीबाट सुरु भयो विद्युत् उत्पादन, उद्योगमा आपुर्ति बढ्ने

१० पुष, दोलखा । माथिल्लो तामाकोशी जलविद्युत् आयोजनाबाट विद्युत उत्पादन पुनः सुचारु भएको छ । अब तामाकोशी आयोजनाबाट १२५ देखि १३० मेगावाट उत्पादन हुनेछ । यसले अहिले भइरहेको विद्युत अभावलाई राहत मिल्नेछ । आयोजनाले माघ पहिलो सातादेखि पूर्ण रूपमा सञ्चालन हुने जनाएको छ । 

असोज १२ मा आएको पहिराले क्षति पुर्याएपछि ४ सय ५६ मेगावाटको माथिल्लो तामाकोशी जलविद्युत् केन्द्रको विद्युत् उत्पादन बन्द भएको थियो । विद्युत् केन्द्रको २ वटा बालुवा थिग्र्याउने पोखरीमध्ये बायाँतर्फको मर्मतपछि सञ्चालनमा ल्याएको छ ।  पहिरोले विद्युत् केन्द्र सञ्चालन गृह पूर्णरूपमा क्षति गरेको थियो ।

तत्कालका लागि जलाशय भरेर ४ मध्ये २ वटा गेट खोलेर नदीको बहाव बराबरको पानी सिधैं विद्युत् गृहमा पठाएर विद्युत् उत्पादन गरिने भएको छ । अहिले भइरहेको उद्योगहरुमा विद्युत आपुर्तिको समस्या अब घटेर जाने नेपाल विद्युत प्राधिकरणले जनाएको छ ।