सीमा तस्करी: सशस्त्रका १४ अधिकृत तानिदा नेपाल प्रहरी भने क्रस चेकसम्म गर्न सकेन्

११ पुस, काठमाडौं । सीमा सुरक्षामा खटिएका सशस्त्र प्रहरीका प्रहरी कमाण्डले गरेको कमजोरीमा मुख्यालयले १४ जना अधिकृतलाई तानेर छानबिन गरिरहेको छ । सीमा सुरक्षामा खटिएको प्रहरी नै तस्करीलाई सहयोग थालेको सम्बन्धमा नेपाल बहसले निरन्तर समाचार प्रकाश गर्दै जाँदा सशस्त्र प्रहरी मुख्यालयले छानबिन शुरु गरेको हो ।

सीमा सुरक्षा र भन्सार छली तस्करी नियन्त्रण गर्ने दायित्व लिएर खटिएका सशस्त्र प्रहरी बलका १४ अधिकृतहरूलाई मुख्यालयले आन्तरिक छानबिन शुरु गरिरहेका बेला नेपाल प्रहरी भने मुक दर्शक बनेको छ । धनुषा, बारा लगायतका जिल्लामा रहेका नेपाल प्रहरीका जिल्ला प्रमुखले तस्करसँगको मिलेमतो भन्सार छलीलाई सहयोग पुर्याएको समाचार प्रकाशन हुँदा नेपाल प्रहरीले नत छानबिन नै गर्यो नत क्रस चेक नै गरेको छ ।

धनुषाका भुवनेश्वर तिवारी, बाराका महेन्द्र खड्कालाई प्रहरी प्रधान कार्यालयले संरक्षण गरिरहेको छ । प्रहरी प्रधान कार्यालयका अधिकारीहरू र प्रहरी महानिरीक्षक वसन्त कुँवर मौन रहेका छन् । अवकाशको मुखमा रहेका कुँवरले चेनअफ कमाण्ड कायम राख्न नसकेको गुनासो आइरहेका बेला सशस्त्र प्रहरीको जसरी क्रस चेक समेत गर्न सकेका छैनन । ‘ तस्करीमा नेपाल प्रहरीबाट खटिएका जिल्ला प्रमुखको पनि साथ रहेको भन्ने गुनासाहरू गृहमन्त्रालयमा आएका छन् हामी त्यसलाई अनुगमन गरिरहेका छौ’, मन्त्रालय स्रोतले भन्यो ।

सशस्त्र प्रहरी बल, सीमा सुरक्षा विभागले ठूलो परिमाणमा तस्करी गराएको आरोपमा उनीहरुलाई उनीहरुलाई छानबिनका लागि तानेको जनाइरहँदा नेपाल प्रहरीका जिल्ला प्रमुखको बारेमा मौन बस्नुले शुभ संकेत नभएको  गृहमन्त्रालय समेत जनाएको छ । यतिबेला सशस्त्र मुख्यालयले ४ गणपति, ४ गुल्मपति र ६ बीओपीका इन्चार्जलाई छानबिनका लागि तानेको छ ।

सशस्त्र प्रहरी ३ नम्बर गणका एसपी विश्व खड्का, सशस्त्र प्रहरी १२ नम्बर गण बाराका सन्तोष बहादुर सिंह, ८ नम्बर गण धनुषाका दर्शन गिरी र ३० नम्बर गण बाँकेका बिमल डाँगी छानबिनका लागि मुख्यालय तानिएका छन् । गिरी धनुषामा विवादित भएको सम्बन्धमा पटक पटक नेपाल बहसले समाचार प्रकाशन गरेको थियो भने, डागी, खड्का र सिंहको बारेमा पनि पटक पटक प्रश्न उठाइएको थियो ।

तस्करी बढेको व्यापक गुनासोपछि बाराका एसपी सिंहमात्र होइन, २ वटा गुल्मका डीएसपी पनि तानिएका छन् । प्रस्तावित गुल्म मटिअर्वा बाराका डीएसपी बिदुर भट्टराई र पिपरपाती गुल्मका राजीव थापा तानिएका छन् । त्यसैगरी, कपिलवस्तुको चाकरचौडा प्रस्तावित गुल्मका इन्चार्ज डीएसपी जयराम बस्नेत, कृष्णनगर गुल्मका शैलेन्द्र न्यौपाने पनि तानिएका थिए  । उनीहरुको सम्बन्धमा सशस्त्र मुख्यालयमा छानबिन चलिरहेको छ ।

भन्सार छली तस्करी बढेको र राजस्व असुली कम भएका समाचारहरू आउन थालेपछि सशस्त्र प्रहरीको नवराजपुर बीओपी सिरहाका रोशन थापा, सुनसरीको अमरडुवा बीओपीका प्रकाश बिक्रम कार्की, मोरङको नोचा बीओपीको जयबहादुर दथेपुथेलाई पनि छानबिनका लागि मुख्यालयमा तानेको छ । महोत्तरी सम्सी बीओपीका कृष्णबहादुर गुरुङ, धनुषाको फुलगामा बीओपीका गणेशकुमार बोहरा, झापा तिरिङ बीओपीका खेमबहादुर कटुवाल तानिएका छन् । तर यहीबीचमा कोशी प्रदेशको कमाण्ड गरिरहेका डीआइजी शम्भू सुवेदी भने अमेरिका उडेका छन् ।