विभिन्न देशसँग संसदीय मैत्री समूह गठन, कांग्रेसले पायो अमेरिकासहित १४ देशको नेतृत्व

११ पुस, काठमाडौं । संघीय संसद् सचिवालयले ३९ वटा देशमा संसदीय मैत्री समूह गठन गरेको छ । विभिन्न देशसँग कुटनीतिक सम्बन्ध र विधायकहरूसँगको सम्बन्ध कायम गर्नका लागि संसदीय मैत्री समूह गठन गर्ने परम्परा अनुसार समूह गठन गरिएको हो । बिहीबार संसदीय मैत्री समूह गठन गरी राजनीतिक दलहरूबीच भागबन्डा समेत गरिएको छ । 

गठित मैत्री समूहमा अमेरिकासहित १४ वटा देशको संयोजक नेपाली कांग्रेसको भागमा परेको छ । अमेरिकामा नेपाली कांग्रेसका तर्फबाट प्रकाशशरण महत संयोजक रहेका छन् । नेकपा एमालेले भारतसहित १२ वटा देशको मैत्री समूहको संयोजक लिएको छ । भारतमा एमालेले रघुवीर महासेठलाई संयोजक बनाएको छ ।

नेकपा माओवादी केन्द्रले चीनसहित ६ वटा देशमा मैत्री समूहको संयोजक लिएको छ । चीनमा माओवादीले नारायणकाजी श्रेष्ठलाई संयोजक बनाएको छ । संसद सचिवालयका अनुसार नेपालसँग दौत्य सम्बन्ध भएका देशमा संसदीय मैत्री समूह गठन गर्ने अभ्यास छ ।

नेपालसँग दौत्य सम्बन्ध भएका विभिन्न देशसँग संसदीय अभ्यास र अनुभव आदानप्रदान गर्नका लागि राष्ट्रियसभा र प्रतिनिधिसभामा रहेका सांसदहरू रहेका संसदीय मैत्री समूह गठन गर्ने गरिएको हो । २०७९ मंसिर ४ मा निर्वाचन सम्पन्न भएपनि त्यसको दुई वर्षपछि मात्रै संसदीय मैत्री समूह गठन भएको छ । समूह गठन गरी सभामुखले एक चरण छलफल पनि गरेका छन् ।