गलत प्रक्रियाबाट जग्गा लिलाम गरेपछि कृषि विकास बैंकको लहानमा शाखामा ऋणीले लगाए ताला

११ पुष, सिरहा । कृषि विकास बैंकको लहान शाखामा ऋणीले ताला लगाएका छन् । गलत प्रक्रियाबाट बहुमूल्य जग्गा कौडीको मूल्यमा लिलाम गरेको भन्दै ऋणीले बैंकको लहान शाखामा तालाबन्दी गरेका हुन् । ऋणीको समर्थनमा स्थानीयवासीहरू पनि बैंक परिसरमा जम्मा भएका छन् । 

बैंकका शाखा प्रबन्धक विवेक पौडेलले यो जग्गा लिलामी विषयमा मौन रहेका छन् । पूर्व प्रबन्धकको पालोमा यो सबै भएको बैंक ऋणीको भनाइ छ । लहान नगरपालिका–२ का किसान रामचन्द्र यादवले पूर्व–पश्चिम राजमार्गमा टाँसिएकै ७ धुर जग्गा बन्धकी राखी ०७७ फाल्गुन १५ गते ३० लाख रुपैयाँ ऋण लिएका थिए । उनले मंसिर महिनाको पनि किस्ता तिरेपछि लिलामी निकालिएको बताएका छन् । 

ब्याज सवाँ गरी हालसम्म १९ लाख ९२ हजार ७७३ रुपैयाँ तिरिसक्दा पनि जग्गा लिलाम भएको र यसले अन्यायमा परेको ऋणी यादवले बताए । तालाबन्दी गरि स्थानीयहरू बैंक परिसरमा नाराबाजी गरिरहेका छन् भने कर्मचारीहरू भित्रै थुनिएका छन् । प्रहरीले बाहिर सुरक्षा दिइरहेको छ । उनीहरूले जग्गा फिर्ता नभएसम्म आन्दोलन गरिने जनाएका छन् ।

०८१ कार्तिक २९ गते जग्गा लिलाम गरिदिने कर्मचारीले धम्की दिएका थिए । पैसा पटक–पटक बुझाइरहँदा पनि चलनचल्ती अनुसार १ करोड ४५ लाखमा बिक्री हुने जग्गा ३५ लाखमै लिलाम गरिदिएको यादवको गुनासो छ । कर्मचारीले आफूलाई लिलामी प्रक्रिया पनि जानकारी नदिएको उनको भनाइ छ ।