१०० दिने अभियान नसकिएका जिल्लामा माघ १६ सम्म कांग्रेसले थप्यो म्याद

११ पुष, काठमाडौं । नेपाली कांग्रेसले केही जिल्लामा १०० दिने अभियानको म्याद थप गरेको छ । बिहीबार एक सूचना जारी गर्दै कांग्रेसले अभियान नसकिएका जिल्लालाई समय थप गरेको जानकारी दिएको छ । ती जिल्लामा सहिद दिवसका दिन १६ माघसम्ममा अभियान सक्न भनिएको छ । 

कांग्रेसको केन्द्रीय कार्यसमितिको २०८१ श्रावण २३ देखि भाद्र १६ सम्म बसेको बैठकको निर्णय अनुसार सांगठनिक गतिविधि प्रभावकारी बनाउन २०८१ असोज ७ मा प्रारम्भ भएको १०० दिने विशेष अभियान राष्ट्रिय एकता तथा मेलमिलाप दिवसको दिन यही पौष १६ मा समापन गर्ने तयारी छ । 
 
जिल्लामा तोकिएका केन्द्रीय प्रतिनिधि, प्रदेश कार्यसमिति, जिल्ला कार्यसमिति लगायतका सबै समिति र सम्बद्ध सबै साथीहरूलाई थप अवधिमा सांगठनिक रूपले गर्न/गराउन निर्धारित सबै कार्यहरू व्यवस्थित रूपले अघि बढाउन निर्देशनसमेत दिइएको छ । 

मुख्य सचिव कृष्णप्रसाद पौडेलका अनुसार  केही जिल्लामा प्राकृतिक प्रकोपको असर, कतिपय जिल्लामा स्थानीय तह उपचुनावका कारण अभियान थाल्न भएको ढिलाइ र अन्य विविध कारणले केही जिल्लामा अभियान सम्पन्न हुन नसकेको हो ।