भाटभटेनी, मोर्डन र नमस्ते रेमिट्यान्सको इजाजत खारेज, रकम लेनदेन भए ३५ दिनभित्र उजुरी दिनुपर्ने

१२ पुष, काठमाडौं । नेपाल राष्ट्र बैंकले तीनवटा रेमिट्यान्स कम्पनीको इजाजत खारेज गरेको छ । भाटभटेनी मनी ट्रान्सफर, मोर्डन रेमिट्यान्स र नमस्ते रेमिट इन्टरनेशनलको इजाजत खारेज भएको राष्ट्र बैंकले जनाएको छ । 
 
कारोबार गर्ने इजाजतको म्याद नवीकरण नगरेकाले खारेज गरेको राष्ट्र बैंकले जनाएको छ । राष्ट्र बैंकले खारेज भएका संस्थासँग रेमिट्यान्सको रकम लिनु दिनु भए ३५ दिनभित्र लिखित जानकारी दिन पनि भनेको छ । ती कम्पनीसँग थप कारोबार नगर्न सचेत गरिएको छ । 

राष्ट्र बैंकले विप्रेषण विनियमावली २०७९ को विनियम १३ को उपविनियम ५ अनुसार यी कम्पनीहरूको लाइसेन्स खारेज गरेको हो । लाइसेन्स खारेज भएका कम्पनीहरूसँग लेनदेन गर्नेले ३५ दिनको अवधि भित्र कुनै दाबी नआएमा कम्पनीहरूको बैंक जमानत स्वतः फुकुवा हुने स्पष्ट गरिएको छ । राष्ट्र बैंकले दाबी गर्दा बैंक जमानतभित्र उपलब्ध रकमसम्म मात्र हिसाब हुने प्रावधान रहेको जानकारी दिएको छ । 

लाइसेन्स खारेजको कारणबारे विस्तृत विवरण सार्वजनिक नगरिए पनि विप्रेषण कारोबारमा पारदर्शिता, विश्वसनीयता, र नियमनको पालना नभएमा कडा कदम चाल्ने गरेको बताइएको छ । यस कदमले रेमिट्यान्स सेवा क्षेत्रमा सुधार ल्याउने राष्ट्र बैंकको अपेक्षा छ । राष्ट्र बैंकले विप्रेषण सेवा लिने वा दिने सबैलाई सचेत रहन र नियमानुसार काम गर्न आह्वान गरेको छ ।